Bieraście pretenduje na praviadzieńnie zimovaha čempijanatu Eŭropy pa lohkaj atletycy ŭ 2011 albo 2012 hodzie. Nadoječy horad nad Buham naviedali prezydent Eŭrapiejskaj asacyjacyi lohkaj atletyki švajcarac Chans‑Jorh Virc i skarbnik hetaj arhanizacyi čech Karał Pilny. Jany ahledzieli spartyŭnyja abjekty horada i jahonuju infrastrukturu. U pryvatnaści hości pabyvali na futbolna‑lohkaatletyčnym spartyŭnym kompleksie «Bieraściejski» i lohkaatletyčnym maniežy.
Treba adznačyć, što paśla rekanstrukcyi, jakaja zakončyłasia ŭ 2005 hodzie, centralny haradzki stadyjon adpaviadaje ŭsim mižnarodnym standartam i źjaŭlajecca ci nie najlepšym u krainie. Na im ustalavanyja elektronnaja systema fotafinišu, tablo, metranom, sučasnaja systema aśviatleńnia, radyjosuviaź, VIP‑łožy, miescy dla presy i kamentatarskija kabiny.
Akramia taho, što niemałavažna, majecca zapasnoje raźminačnaje pole. Ciapier stadyjon moža źmiaścić kala 11 tysiač hledačoŭ, pryčym kala 80 adsotkaŭ ź ich raźmiaščajucca pad dacham zachodniaj trybuny. Jak paviedamiŭ dyrektar stadyjonu Kazimir Rynkievič, zusim niadaŭna pradstaŭniki adnoj ź niamieckich firmaŭ poŭnaściu abnavili pakryćcio biehavych darožak, i bieraściejski spartyŭny centar na siońnia źjaŭlajecca adzinym u krainie, na jakim možna pravodzić spabornictvy pa lohkaj atletycy najvyšejšaha ŭzroŭniu.