Alaksandr Łukašenka, vystupajučy siońnia na kalehii MUS pa vynikach pracy orhanaŭ unutranych spraŭ za 2015, papiaredziŭ milicyju ab niedapuščalnaści praźmiernaha kantrolu pradprymalnikaŭ.
«Nam patrebny kantrol, ale hety kantrol nie pavinien być praźmiernym», — skazaŭ kiraŭnik dziaržavy. Jon padkreśliŭ, što pravierki pavinny vieścisia tolki pry najaŭnaści apieratyŭnaj infarmacyi. «I heta ŭsio pad kantrolem. I my pravierym, na jakoj padstavie», - adznačyŭ jon.
«Treba pamiatać adno: nikoha nie treba «cisnuć i ckavać», - papiaredziŭ Alaksandr Łukašenka. — U vas pavinien być fakt, choć by adzin, dla taho kab pryjści i jaho pravieryć».
Jon adznačyŭ, što heta nie źjaŭlajecca tendencyjaj u milicyi, adnak padobnyja fakty majucca.
«Biaźlitasna budziem vysiakać heta. My pavinny być spraviadlivymi. My ćviorda budziem stavicca da pravaparušalnikaŭ, — skazaŭ kiraŭnik dziaržavy. — Ale kali budziecie «cisnuć» niezakonna, vypracoŭvajučy schiemy ŭ płanie kankurujučych niejkich struktur, kahości «cisnuć», a kahości padtrymlivać, litaści ad mianie nie čakajcie».
Pry hetym jon dadaŭ, što ŭ pieršym kvartale maje namier zaprasić na naradu pradstaŭnikoŭ ekanamičnaha błoka, asobnych kiraŭnikoŭ pradpryjemstvaŭ i pradprymalnikaŭ, kab pradstavić im fakty siłavych struktur ab vyjaŭlenych ekanamičnych złačynstvach i tym samym spynić razmovy na temu zabarony pravierak.
