Jak minimum stokiłamietrovuju ścianu płanujecca pabudavać vakoł Bahdada, kab nie dazvolić bajevikam-isłamistam ID biespakarana traplać u horad, paviedamiła Ministerstva abarony Iraka, piša Reuters.
washingtonpost.com
ID kantraluje terytoryi na poŭnačy i na zachadzie Iraka i apošnimi miesiacami arhanizavała ŭ Bahdadzie niekalki teraktaŭ. U vyniku apošniaha, kali bajeviki pačali zabivać u handlovym centry, zahinuła 18 čałaviek.
Budavać ścianu ź bietonu 3 mietry ŭ vyšyniu pačali na hetym tydni na zachadzie Bahdada, paviedamiła Associated Press.
Samym spakojnym rajonam Bahdada była z 2003 hoda tak zvanaja «Zialonaja zona», jakuju pabudavali amierykanskija vojski. Heta abkružanyja ścianoj i błokpastami kvartały, dzie stajać uradavyja budynki Iraka, parłamient i mnohija ambasady, u tym liku ZŠA i Brytanii.
Amal siaredniaviečnyja ŭmacavańni byli hałoŭnym srodkam, kab nie dapuścić praryvaŭ terarystaŭ-śmiarotnikaŭ na aŭtamabilach, naładavanych vybuchoŭkaj.
Taksama šmatlikija ścieny ŭźnikli pamiž roznymi kvartałami Bahdada, kali pačaŭsia žorstki kanflikt pamiž sunitami i šyitami, padčas jakoha abodva baki źniščali dla zapałochvańnia i pomsty mirnaje nasielnictva inšaj kanfiesii.
