Były dyrektar sanatoryja «Biełaruś» u Sočy, jaki ŭvachodzić u strukturu Upraŭleńnia spravami prezidenta Biełarusi, Hieorhij Sarakašyš pamiłavany biełaruskim prezidentam. Pra heta TUT.BY raspaviała infarmavanaja krynica.
«Sarakašyš — dobry mužyk. Raspłačvaŭsia za pamyłki inšych. Dobra, što [jaho] pamiłavali», — skazaŭ adzin ź jaho znajomych. Padrabiaznaściaŭ jon nie viedaje. Miarkuje, što vyzvaleńnie było praviedziena ŭ ramkach usieahulnaj kampanii pa pamiłavańni byłych dziaržsłužačych, jakich vyzvalajuć z turmy i nakiroŭvajuć padymać prablemnyja pradpryjemstvy.
Hramadzianin Rasii Hieorhij Sarakašyš byŭ zatrymany ŭ śniežni 2012 hoda. Kampaniju tahačasnamu kiraŭniku sanatoryja skłali jaho namieśnik Alaksandr Kizima i kiraŭnik sočynskaj budaŭničaj kampanii Andrej Mierankoŭ. U kastryčniku 2014 hoda Kizima i Mierankoŭ atrymali pa 9 hadoŭ pazbaŭleńnia voli, a Sarakašyš byŭ asudžany da 6 hadoŭ źniavoleńnia. Jany asudžanyja za bujny kradziež srodkaŭ. Pavodle dadzienych śledstva, jakija byli paćvierdžanyja padčas sudovaha pasiedžańnia, abvinavačanyja pryčynili škodu Upraŭleńniu spravami prezidenta Biełarusi na sumu kala 22 młrd rubloŭ, što składała bolš za 2 młn dalaraŭ. Złačynstva było ździejśniena padčas budaŭnictva kompleksu adpačynku ŭ pasiołku Krasnaja Palana kala horada Sočy napiaredadni zimovaj Alimpijady-2014. Dadzieny kompleks zadumvaŭsia jak składovaja častka sanatoryja «Biełaruś».
U pryjomnaj dyrektara sanatoryja ŭ Sočy nie majuć infarmacyi pra Hieorhija Sarakašyša. U jaho siamji atrymać kamientar taksama nie ŭdałosia.
Hieorhij Sarakašyš pa nacyjanalnaści hrek. U sanatoryi «Biełaruś» u Sočy pracavaŭ hałoŭnym doktaram, zatym namieśnikam dyrektara. A potym zaniaŭ i kirujučaje kresła. Vydatnik achovy zdaroŭja Rasijskaj Fiederacyi.
