Na partale Ministerstva justycyi ŭ testavym režymie pracuje Rejestr daŭžnikoŭ. Kab znajści tam niepłacielščyka, treba viedać nie tolki jaho proźvišča, imia i imia pa baćku, ale i identyfikacyjny numar u pašparcie.
Siońnia Rejestr u asnoŭnym składajecca z proźviščaŭ fizičnych asob. Pracu pa farmiravańni bazy skončać ŭžo ŭ 2016 hodzie.
— Kali vy prychodzicie brać kredyt u bank abo prosta z kimści damaŭlajeciesia pra pazyku hrošaj — lubyja žyćciovyja situacyi mohuć być — u vas mohuć paprasić dazvołu pahladzieć, ci źjaŭlajeciesia vy daŭžnikom. Vy, z adnaho boku, možacie admović u pradastaŭleńni svajho identyfikacyjnaha numara — ale heta ŭžo padstava zadumacca, što vy niešta chavajecie. Ź inšaha boku, vy možacie pradastavić hety numar, i ŭ vašaj prysutnaści možna pravieryć, pahladzieć, ci jość vykanaŭčaja vytvorčaść, — patłumačyŭ ministr justycyi Aleh Śližeŭski.
Adkazvajučy na pytańnie, ministr raspavioŭ, što ŭžo siońnia moža być nakładzieny aryšt na aŭtamabil niepłacielščyka, mohuć być źniatyja hrošy ź jaho mabilnaha rachunku. Akramia taho, u daŭžnikoŭ užo možna adbirać hrošy i z rachunkaŭ za internet — pakul hetaja miera pracuje ŭ testavym režymie. Jak tłumačyć Miniust, tut usio zaležyć ad taho, jakaja suma ličycca za daŭžnikom. Pry bujnym doŭhu mohuć nakłaści aryšt na aŭto, a kali suma nievialikaja, zabłakujuć mabilnyja rachunki.
Miniust taksama pracuje nad novaj mieraj baraćby z daŭžnikami: śpiecyjalisty prapanujuć nie vydavać im pasyłki, dasłanyja z-za miažy. Płanujecca, što noŭvaŭviadzieńnie zapracuje ŭžo ŭ hetym hodzie. Jak patłumačyŭ ministr, dla hetaha nieabchodna zaklučyć pahadnieńnie ź Ministerstvam suviazi i infarmatyzacyi i atrymać dostup da jaho baz.
