 |
U niadzielu na Biełaruskim telebačańni ŭ vynikovaj pieradačy «Panarama tydnia» byŭ pakazany čarhovy repartaž žurnalista Jurja Prakopava pra dziejnaść amerykanskaha pasolstva ŭ Miensku.
Farmalnaj pryčynaj dla pakazu repartažu stałasia toje, što amerykanskaja ambasada znoŭ spyniła vydaču vizaŭ hramadzianam Biełarusi.
«Zamiest taho, kab skaracić lišniuju publiku, jakaja nieviadoma čym zajmajecca, Dziarždepartament uziaŭ i skaraciŭ konsulski adździeł. Čamu tady biełaruskaje pasolstva ŭ Vašynhtonie ź jaho nievialikim persanałam spraŭlajecca i z vydačaj viz, i z akazańniem konsulskich pasłuh biełarusam. Amerykanskija dyplamaty ci to pracavać nia chočuć, ci nia ŭmiejuć, ci to heta zusim nie dyplamaty, a niejkija ludzi z dyppašpartami, jakija zajmajucca čym zaŭhodna tolki nie svaimi naŭprostavymi abaviazkami», – aburajucca televizijniki.
Na praciahu ŭsiaho repartažu milhali kadry taho, jak pasoł Karen Stjuart naviedvaje Ŭpravu Partyi BNF, «rejtynh jakoj nižej plintusa», ci jak supracoŭniki dypmisii nazirajuć za praviadzieńniem vuličnych akcyj apazycyi. Taksama raz-poraz hledačy bačać lideraŭ biełaruskich demakratyčnych siłaŭ – Anatola Labiedźku, Alesia Michaleviča, Ihara Rynkieviča, – jakija iduć u budynak pasolstva ZŠA.
Akazvajecca, što mienavita dziakujučy amerykanskim dyplamatam miž našymi krainami niama narmalnych ni palityčnych, ni ekanamičnych stasunkaŭ. Spektar dziejnaści amerykancaŭ u Biełarusi zaklučajecca ad «umiašalnictva va ŭnutranyja spravy i ŭtrymańnia zakrytaha klubu biełaruskaj apazycyi da ŭciahvańnia biełarusaŭ u špijonskuju dziejnaść».
«Asnoŭny pryjarytet pracy amerykanskaha pasolstva ŭ Miensku – dapamoha chulihanam i radykałam», – kaža Prakopaŭ. Adrazu pakazvajucca kadry pieršaha sakratara pasolstva Luisa Kryšaka, jakija prychodziŭ na sud nad Andrejem Kimam, a taksama byŭ u Połacku, kab padtrymać «adnu junuju damu, jakaja viadomaja Femidzie pa nieskładanych malunkach na ścienach administracyjnych budynkaŭ». Darečy, akazvajecca, što viciebskaje abłasnoje kiraŭnictva napiaredadni sudu nad Sałaŭjovaj nakiroŭvała list Kryšaku, dzie adznačałasia niežadańnie bačyć dyplamata ŭ Połacku.
«U Biełarusi amerykanskija dyplamaty padtrymlivajuć tych, chto hańbić dziaržaŭnyja symbali, ładzić bojki ź milicyjaj, pluje na zakony», – padsumoŭvaje reparcior.
