Ministerstva pa padatkach i zborach moža atrymać prava patrabavać dekłaracyi ab dachodach i majomaści hramadzian mienš čym za kalandarny hod.
Takaja norma praduhledžana zakonaprajektam «Ab uniasieńni źmienaŭ i dapaŭnieńniaŭ u zakon Respubliki Biełaruś «Ab dekłaravańni fizičnymi asobami dachodaŭ i majomaści», jaki rychtujecca da pieršaha čytańnia ŭ parłamiencie.
Dakumient 15 lutaha razhladaŭsia na pašyranym pasiadžeńni pastajannaj kamisii Pałaty pradstaŭnikoŭ.
Zhodna z novaŭviadzieńniami, dziejańni zakona nie buduć raspaŭsiudžvacca na dekłaravańnie dachodaŭ i majomaści dziaržsłužačych, bo normy ŭ dačynieńni da ich ustanoŭlenyja pryniatym u minułym hodzie zakonam ab baraćbie z karupcyjaj. Prajekt dakumienta taksama dapaŭniaje pieralik dziaržorhanaŭ, jakija mohuć zapatrabavać dekłaracyi ŭ hramadzian. Takim pravam nadzialajecca Śledčy kamitet.
Adnym z asnoŭnych prapanavanych novaŭviadzieńniaŭ namieśnik ministra pa padatkach i zborach Śviatłana Šaŭčenka nazvała skaračeńnie terminu, za jaki moža być zapatrabavanaja dekłaracyja — zaraz atrymać źviestki ab dachodach i vydatkach hramadzian možna nie mienš čym za adzin kalandarny hod.
«Z čym sutyknulisia na praktycy: čaściakom pravaachoŭnyja orhany vyjaŭlali niadobrasumlennych asob, nakiroŭvali zapyt u padatkovyja orhany ab supastaŭleńni dachodaŭ i raschodaŭ u biahučym hodzie. Ale za biahučy hod dekłaracyju zapatrabavać mahčymaści niama, zakonam heta nie praduhledžana», — adznačyła jana. Tamu, udakładniła Šaŭčenka, padatkovym orhanam prapanujuć dać prava zapatrabavańnia dekłaracyi za niekalki miesiacaŭ biahučaha kalandarnaha hoda.
Akramia taho, dakładna abmiažoŭvajecca termin na tłumačeńni ŭ vypadku, kali vydatki hramadzianina pieravyšajuć jaho dachody: siońnia fizičnym asobam dajecca 30 dzion na tłumačeńni, ale na praktycy, adznačyła namieśnik ministra, padatkapłacielščyki mohuć nieadnarazova mianiać svaje tłumačenni, i «heta pieratvarajecca ŭ biaskoncy praces». Tamu prapanujecca pa zakančeńni hetych 30 dzion nadzialić MPZ pravam pravodzić raźlik padachodnaha padatku, nie čakajučy tłumačeńniaŭ z boku hramadzian.
Šaŭčenka ŭdakładniła, što ŭ 2015 hodzie padatkovyja orhany spahnali ŭ biudžet ad asob, čyje vydatki istotna pieravyšali dachody, «44 młrd. rubloŭ žyvych hrošaj».
