U 2015 hodzie ŭ Minsku byli niezakonna pryciahnutyja da kryminalnaj adkaznaści 11 čałaviek. Pra heta paviedamiŭ na sustrečy z žurnalistami prakuror horada Siarhiej Chmaruk.
Pavodle słoŭ prakurora, niekatoryja z hetych 11 hramadzian byli apraŭdanyja, u dačynienni da inšych u vyniku rasśledavańnia było pryniataje rašeńnie ab spynieńni kryminalnaha pieraśledu i reabilitacyi.
«U 2014 hodzie było 15. Ale chiba možam my kazać pra statystyku? Navat kali b byŭ adzin niezakonna pryciahnuty — heta taksama była b nahoda dla razmovy i z prakurorami, i prakurora sa śledčymi», — padkreśliŭ Chmaruk.
Pry hetym, pavodle jaho słoŭ, «niejkich sistemnych prablem u pracy ŭpraŭleńnia Śledčaha kamiteta pa Minsku niama». «Pavodle našaj acenki, jano pracuje rytmična i dosyć jakasna. Nam udałosia arhanizavać pracu i pa materyjałach, jakija nakiroŭvajucca z orhanaŭ unutranych spraŭ jak orhana daznańnia, dla raspačynańnia i rasśledavańnia kryminalnych spraŭ u śledčych padraździaleńniach», — adznačyŭ Chmaruk.
«Kolkaść viernutych materyjałaŭ z SK u MUS źmienšyłasia šmatkroć. Tym nie mienš, jak praviła, rašeńnie ab ich viartańni ŭ orhany daznańnia śledčymi prymalisia abhruntavana ŭ 95% vypadkaŭ. Heta značyć śledčyja dosyć abjektyŭna aceńvajuć materyjały, što pastupili da ich z orhanaŭ unutranych spraŭ», — skazaŭ prakuror Minska.
Pry hetym, pavodle jaho słoŭ, «prablemy, jakija ŭźnikajuć pa kankretnych kryminalnych spravach abo pa materyjałach ŭ roznaj kryminalna-pravavoj acency, byli zaŭsiody, jość i buduć». «Ale heta asobnyja, dosyć dyskusijnyja pytańni, ź jakimi pavinny raźbiracca prafiesijanały — śledčyja i prakurory», — kanstatavaŭ Chmaruk.
U vyniku, paviedamiŭ jon, prakurorami letaś byli raspačatyja 163 kryminalnyja spravy. «Prakurory byli vymušanyja ŭmiašacca ŭ praces znosin pamiž orhanami daznańnia i śledstva, bo byli vyjaŭlenyja prykmiety złačynstvaŭ», — rastłumačyŭ Chmaruk.
Jon taksama zaznačyŭ, što jość vypadki niezakonnaha raspačynańnia kryminalnych spraŭ. U 22 vypadkach u minułym hodzie prakurory admianili pastanovy ab raspačynańni kryminalnych spraŭ «tam, dzie niama złačynnych zamachaŭ». Dźvie kryminalnyja spravy, jakija byli raspačatyja, rasśledavanyja, prakurory spynili. «Materyjały byli niajakasnyja i acenka niepiśmiennaja», — kanstatavaŭ prakuror Minska.
112 kryminalnych spraŭ prakurory viarnuli śledčym u suviazi ź niajakasnym rasśledavańniem. U 50 vypadkach u sudach dziaržabvinavaŭcami byli vystaŭlenyja novyja abvinavačvańni. «Dziaržaŭnyja abvinavaŭcy vymušanyja byli heta zrabić», — zaznačyŭ prakuror Minska.
