Bolš za pałovu achvotnych atrymać ziamielny ŭčastak stajać u čarzie ŭ Minskim rajonie. Takija dadzienyja paviedamiŭ 18 lutaha na pres-kanfierencyi ŭ Minsku staršynia Dziaržkammajomaści Andrej Hajeŭ.
Pavodle jaho infarmacyi, čarha achvotnych atrymać ziamielny ŭčastak u Biełarusi składaje bolš za 60 tysiač čałaviek. Ź ich bolš za 30 tysčia čakajuć atrymańnia ziamli ŭ Minskim rajonie. «Ludzi ŭparta, metanakiravana stajać u čarzie, kab atrymać učastak u Minskim rajonie, choć krychu dalej svabodnych — šmat», — adznačyŭ Hajeŭ.
«Tam, dzie pražyvaje nievialikaja kolkaść nasielnictva, dzie šmat pustych učastkaŭ, nie vypadaje havaryć ab efiektyŭnaści vystaŭleńnia ziamielnych učastkaŭ na aŭkcyjony, možna mierkavać pra ich vynik. Ale tam jość mahčymaść nie apłačvać atrymańnie ŭčastka ŭ pažyćciovaje vałodańnie», — skazaŭ kiraŭnik kamiteta. Na jaho dumku, u miascovaściach z pavyšanym popytam aŭkcyjon zabiaśpiečvaje «prazrystaść pracesaŭ».
U cełym, jak ličyć Hajeŭ, u ziamielnych adnosinach usie bazavyja pytańni ŭžo vyrašany. «Ale heta nie aznačaje, što ŭsio zastyła i budzie stajać na miescy», — adznačyŭ jon i ŭdakładniŭ, što Dziaržkammajomaści pracuje ciapier nad uniasieńniem źmianieńniaŭ u bazavy ŭkaz prezidenta № 667, jaki rehuluje pytańni kanfiskacyi i pradastaŭleńnia ziamielnych učastkaŭ. «Heta treba dla taho, kab z ulikam praktyki spraścić peŭnyja momanty ŭ płanie prachodžańnia dakumientacyi i inšych pracedur. Kab pa hadzinach, pa sutkach raśpisać praces vydzialeńnia i kanfiskacyi ziamielnych učastkaŭ. Pieranieści normy, jakija majuć stabilny charaktar, u Kodeks ab ziamli, a va ŭkazie kiraŭnika dziaržavy rehulavać sam praces kanfiskacyi i vydzialeńnia ziamielnych učastkaŭ», — rastłumačyŭ jon.
