 |
14 krasavika 2008 h. Łukašenka padpisaŭ Dekret №7 «Ab uniasieńni źmianieńniaŭ i dapaŭnieńniaŭ u Dekret prezidenta Respubliki Biełaruś ad 20 sakavika 1998 h. №3». Pavodle dakumenta, pryvatyzacyja budzie praciakać zhodna z trochhadovym planam, zaćvierdžanym uradam i miascovymi savietami deputataŭ: na praciahu 2008 h. budzie źniataje abmiežavańnie na prodaž akcyjaŭ pradpryjemstvaŭ, u statutnym fondzie jakich dziarždola pieravyšaje 75 %; u 2009 h. taki los čakaje pradpryjemstvy z udziełam dziaržavy zvyš 50 %, a pačynajučy z 2011 h. usie abmiežavańni buduć źniatyja. Taksama pastupova buduć źniatyja abmiežavańni na pieraprodaž akcyj biełaruskich kampanij, atrymanych biełaruskim hramadzianami padčas vaŭčarnaj pryvatyzacyi.
Pieršyja dva etapy nie datyčać pradpryjemstvaŭ, što «zabiaśpiečvajuć funkcyjanavańnie stratehična značnych halinaŭ». Śpis pradpryjemstvaŭ, što padlahajuć pryvatyzacyi, zaćviardžajecca prezydentam.
Rasiejski «Kommiersant» źviazvaje źjaŭleńnie novaha dekretu z žadańniem Łukašenki zachavać stabilnaść biełaruskaj ekanomiki: «Pryvatyzacyjny» dekret Alaksandra Łukašenki — heta sproba zatknuć biudžetnyja dzirki, vyklikanyja najpierš rostam cenaŭ na rasiejskija haz i naftu. Hazeta pryvodzić mierkavańnie biełaruskaha ekanamista Jarasłava Ramančuka pra toje, što ŭ pryvatyzacyjnyja śpisy, jakija zaćviardžajucca asabista prezydentam, nie patrapiać NPZ, «Biełaruśkalij», «Biełtelekam», Biełaruski metalurhičny kambinat.
Varta nahadać, što sioleta na pačatku sakavika ŭ Biełarusi byŭ admienieny instytut «załatoj akcyi» — asablivaha prava dziaržavy na ŭdzieł u kiravańni haspadarčymi tavarystvami. Zroblena heta było z metaj palapšeńnia investycyjnaha klimatu i dasiahnieńnia ŭ 2008 hodzie prahnoznych parametraŭ ekanamičnaha rostu, a taksama pavyšeńnia rejtynhu Biełarusi na mižnarodnym uzroŭni i abaronie pravoŭ investaraŭ na rynku kaštoŭnych papier. Toj krok, jak i ŭčorašni dekret, rasiejcy rascanili, jak vymušanuju mieru. «Rost cenaŭ na enerhanośbity vymušaje Biełaruś zamańvać zamiežnyja hrošy. Dziela hetaha prezydent Łukašenka navat pajšoŭ na admienu «załatoj akcyi» — prava dziaržavy dyktavać svaju volu pryvatnym kampanijam», pisała Hazieta.ru.
