U zakon «Ab achovie pravoŭ spažyŭcoŭ» ad 9 studzienia 2002 hoda buduć uniesienyja dapaŭnieńni i źmianieńni, paviedamiła načalnik upraŭleńnia achovy pravoŭ spažyŭcoŭ i kantrolu za rekłamaj Ministerstva handlu Iryna Baryšnikava 10 sakavika na sustrečy z žurnalistami ŭ pres-centry infarmahienctva BiełTA.
Pavodle jaje słoŭ, źmieny abumoŭlenyja «praktykaj, što ŭstalavałasia siońnia, i realijami ŭzajemaadnosin pamiž subjektami haspadarańnia i spažyŭcami». «Nieabchodna pryvieści ŭ adpaviednaść niekatoryja aznačeńni zakona z normami mižnarodnych dahavoraŭ i techničnych rehłamientaŭ Mytnaha sajuza. Hetuju pracu my budziem pravodzić abdumana, kab ni ŭ jakim razie nie pahoršyć pravy našych spažyŭcoŭ», — adznačyła Baryšnikava.
Jana paviedamiła, što buduć udakładnienyja kampietencyi dziaržaŭnych orhanaŭ u śfiery abarony pravoŭ spažyŭcoŭ. «Taksama abmiarkoŭvajecca pytańnie ab uviadzieńni tak zvanaha pieryjadu achaładžeńnia pry nabyćci tavaraŭ praź internet abo pa pošcie i pa telefonie. Miarkujecca, što na praciahu siami dzion možna budzie viarnuć luby jakasny tavar, nabyty takim sposabam, niezaležna ad taho, ci znachodzicca jon u pieraliku tavaraŭ, jakija nie padlahajuć abmienu. Heta pieravažna budzie tyčycca składanatechničnych tavaraŭ», — adznačyła načalnik upraŭleńnia.
Pavodle jaje słoŭ, Minhandlu prapanuje ŭnieści ŭ zakon normu, zhodna ź jakoj nielha budzie źmianiać canu na tavar, nabyty pavodle ŭzoraŭ, z momantu zamovy. Płanujecca taksama zabaranić ŭžyvać roznyja ceny na tavary ŭ zaležnaści ad formy ich apłaty (najaŭnym abo bieznajaŭnym sposabami). «My ciapier u kramie niaredka sutykajemsia z takoj situacyjaj. Tamu chočam u zakonie bolš vyrazna prapisać hetyja patrabavańni», — skazała Baryšnikava.
Jana nahadała, što kožny hod 15 sakavika ŭ Biełarusi adznačajuć Dzień spažyŭca. Sioleta jon prachodzić pad devizam «Zdarovaje charčavańnie — vybar sučasnaha spažyŭca». «Akcentam mierapryjemstvaŭ i ŭ infarmacyjnych materyjałach stanie niedapuščalnaść najaŭnaści antybijotykaŭ u praduktach charčavańnia», — adznačyła čynoŭnik. Pavodle jaje słoŭ, za pieryjad ź letašniaha Dnia spažyŭca byŭ realizavany płan mierapryjemstvaŭ — praviedzienaja infarmacyjna-aśvietnickaja praca, raźmieščanaja rekłama pra zdarovy sposab žyćcia.
