Mitrapalit Minski i Zasłaŭski Pavieł, patryjaršy ekzarch usiaje Biełarusi nie bačyć ničoha haniebnaha ŭ tym, kab carkva budavała dachodnyja damy. Takoje mierkavańnie jon vykazaŭ u interv`iu telekanału STV.
Na dumku mitrapalita, Biełaruś całkam moža pieraniać zamiežny dośvied pošuku srodkaŭ dla ŭtrymańnia chramaŭ praz budaŭnictva i zdaču ŭ arendu dachodnych damoŭ.
«Hreki, dzie budujuć u jakoj-niebudź krainie chramy, prychody, jany abaviazkova pry chramie budujuć dom dla śviatara, dla prychodu. I dachodny dom. I voś hety dachodny dom jany zdajuć abo ŭ arendu, abo pamiaškańni zdajuć dla kramaŭ, restarančykaŭ, kaviarniaŭ, tam niešta takoje. Atrymlivajučy dachod, jany tym samym na hety dachod utrymlivajuć chram», — skazaŭ jon.
Adkazvajučy na pytańnie, nakolki jon dapuskaje taki biznes u Biełarusi, mitrapalit Pavieł pryvioŭ dośvied Budapiešta.
«A čamu b i nie? U nas u Budapiešcie jość takoje. I ničoha takoha haniebnaha ŭ hetym niama. My ž nie ŭzbahačajemsia, voś što vy pavinny zrazumieć. My atrymanyja srodki ad hetaha dachodu vykarystoŭvajem na statutnuju dziejnaść. I, darečy skazać, i statut, i zakanadaŭstva dazvalajuć heta rabić, — rastłumačyŭ jon. — I ŭ nas u Biełarusi toje ž samaje. Zakanadaŭstva dazvalaje, i statut naš dazvalaje. My prosta voś nijak nie razvarušymsia. Tamu ja svaim raskazvaju: davajcie-davajcie voś niešta rabić, kab my sami zarablali».
