Biełaruś raźličvaje na atrymańnie sioleta pryblizna 1,1 młrd. dołaraŭ kredytu ź Jeŭrazijskaha fondu stabilizacyi i raźvićcia (JEFSR), paviedamiŭ 16 sakavika na kanfierencyi ŭ Minsku pieršy namieśnik staršyni praŭleńnia Nacbanka Taras Nadolny.Pry hetym jon adznačyŭ, što atrymać jeŭrazijski kredyt u Biełarusi bolš šancaŭ, čym kredyt Mižnarodnaha valutnaha fondu.
Pavodle źviestak BiełaPAN, u 2016 hodzie valutnyja abaviazacielstvy Minfina Biełarusi (u miežach płaciažoŭ pa źniešnim dziarždoŭhu) pa miždziaržkredytach Rasii i papiarednim kredycie JEFSR składajuć amal 1 młrd. 150 młn. dołaraŭ. Takim čynam, suma pieršaha tranšu jeŭrazijskaha kredytu praktyčna roŭnaja pamieru abaviazacielstvaŭ Biełarusi pierad Rasijaj i JEFSR na najaŭny hod.
Umovy atrymańnia kredytu JEFSR Biełaruś uzhadniaje z Rasijaj užo pryblizna hod. Z zajaŭkaj na atrymańnie stabilizacyjnaha kredytu ŭ 3 młrd. dołaraŭ Biełaruś źviarnułasia ŭ JEFSR ŭ sakaviku 2015 hoda. Paźniej padčas pieramoŭ suma kredytu była źnižanaja da 2 młrd. dołaraŭ.
U lutym 2016 hoda paśla pasiadžeńnia Vyšejšaha dziaržsavieta Sajuznaj dziaržavy pasoł Rasii ŭ Biełarusi Alaksandr Surykaŭ zajaviŭ, što rašeńnie ab davańni jeŭrazijskaha kredytu Biełarusi «pryniataje kančatkova i biespavarotna», i najbližejšym časam kredytnaja prahrama budzie padpisanaja.
Pavodle infarmacyi BiełaPAN, adnoj z umoŭ vydzialeńnia Biełarusi jeŭrazijskaha kredytu źjaŭlajecca abmiežavańnie ŭ 2016—2017 hadach raschodaŭ respublikanskaha biudžetu na apłatu pracy. Miarkujecca, što ŭ 2016 hodzie raschody biełaruskaha biudžetu na apłatu pracy vyrastuć nie bolš jak na zapłanavany ŭzrovień inflacyi (12%). Anałahičnaja ŭmova tyčycca 2017 hoda, kali inflacyja płanujecca na ŭzroŭni 9%, — adpaviedna na hetuju vieličyniu moža vyraści fond zarpłaty respublikanskaha biudžetu.
Akramia taho, pavodle źviestak BiełaPAN, umovaj vydzialeńnia jeŭrazijskaha kredytu źjaŭlajucca abaviazacielstvy Biełarusi ŭ śfiery ŭstanaŭleńnia taryfaŭ na płatnyja pasłuhi. Havorka idzie, u pryvatnaści, ab tym, što ŭzrovień kampiensacyi nasielnictvam koštu žyllova-kamunalnych pasłuh vyraście ŭ 2016 hodzie da 50% (suprać 30% u 2015-m). U kancy 2017 hoda, jak čakajecca, nasielnictva budzie pakryvać 70% koštu žyllova-kamunalnych pasłuh.
Anałahičnyja źmieny zapłanavanyja ŭ dačynieńni da transpartnych pasłuh. Miarkujecca, što da kanca 2016 hoda nasielnictva budzie pakryvać 65% koštu takich pasłuh (suprać 60% u 2015-m) i na 70% kampiensavać košt prajezdu ŭ hramadskim transparcie ŭ kancy 2017 hoda.
Jašče adnoj umovaj vydzialeńnia jeŭrazijskaha kredytu źjaŭlajecca libieralizacyja cen na tavary i pasłuhi (elektrasuviazi i paštovaj suviazi), jakija rehulujucca dziaržavaj.
