Jak paviedamlaje telekanał «Pieršy Tulski», usiaho ŭ pasiołak z nasielnictvam u 9 tysiač prybyli kala 300-400 supracoŭnikaŭ palicyi, u tym liku bajcoŭ AMAPa. Pa dadzienych vydańnia Myslo, u Plachanava prybyli 500 supracoŭnikaŭ palicyi: bajcoŭ unutranych vojskaŭ, śpiecyjalnaha atrada chutkaha reahavańnia, supracoŭnikaŭ PPS, a taksama kinołahaŭ.
Jany ačapili pasiołak i razharnuli palavuju kuchniu. Paviedamlajecca, što meta apieracyi — zabieśpiačeńnie pracy supracoŭnikaŭ hazavaj słužby, što likvidujuć niezakonnaść urezki ŭ trubu.
Vydańnie «Tulskije novosti» zaznačaje, što cyhany, jakija zładzili napiaredadni biesparadki, znachodziacca na adlehłaści 15-20 mietraŭ ad supracoŭnikaŭ palicyi. Pa dadzienych vydańnia, dvoje ź ich «aktyŭna žestykulavali» pobač z amapaŭcami i byli zatrymanyja z prymianieńniem śpiecsrodkaŭ u vyhladzie dubinak.
Pres-sakratar upraŭleńnia MUS pa Tulskaj vobłaści Andrej Jarcaŭ raspavioŭ RBK, što palicyja zatrymała čatyroch čałaviek ź liku «najbolš aktyŭnych miascovych žycharoŭ». Jany byli dastaŭleny ŭ pastarunak, kab «kanflikt nie razrastaŭsia», adznačyŭ Jarcaŭ.
Krynica RBK, blizkaja da pravaachoŭnych orhanaŭ rehijonu, raspaviała, što siłavikam dadziena kamanda dziejničać maksimalna karektna i pa mahčymaści nie ŭstupać u supraćstajańnie z cyhanami.
***
15 sakavika hrupa miascovych cyhan pasprabavała niezakonna padłučycca da hazapravoda, u vyniku čaho biez hazu zastalisia 400 pryvatnych damoŭ. Sproba likvidavać parušeńni pryviała da bojki z palicyjaj, padčas jakoj cyhany palili šyny, a taksama zakidvali pałkami, kamianiami i butelkami budynak pasiałkovaj administracyi. Akramia hetaha jany raźbili škło ŭ buldoziery, jaki pracavaŭ u miescy ŭciečki.
U zajavie prakuratury Tulskaj vobłaści zaznačajecca, što napiaredadni dzieviaci žycharam Plachanava byli abvieščanyja zaściarohi ab niedapuščalnaści parušeńniaŭ zakona.
Sami cyhany śćviardžajuć, što ničoha niezakonnaha nie rabili. Pa słovach ich barona, jaki nazvaŭ siabie Ivanam Ryhoravičam, sami cyhany, jakija pražyvajuć u Plachanavie z 1960-ch hadoŭ, nieadnarazova sprabavali pravieści haz i zakupili abstalavańnie, adnak administracyja nie dazvoliła im aficyjna padłučycca da truby.
