Siońnia ŭ minskim kłubie «Loft» (vulica Pietrusia Broŭki, 22) kulturnaja placoŭka «Art-siadziba» ładzić pieršy fiestyval «ArtSiadziba Forum, albo Dzień Vyšymajki».
Udzień prajšoŭ forum, na jakim «Art-siadziba» padzialiłasia svaimi dasiahnieńniami i płanami.
«Prablemy zaŭsiody natchniali nas na niejkija dziejańni. I tak my z maleńkaha pamiaškańnia na zavodzie «Haryzont» pačali pieraŭtvaracca ŭ bujnyja prajekty. Nam spaŭniajecca 5 hadoŭ, tamu ŭ hetym hodzie my płanujem šmat mierapryjemstvaŭ», — adznačyŭ Pavał Biełavus, adzin z zasnavalnikaŭ «Art-siadziby».
Siarod jaskravych prykładaŭ pracy «Art-siadziby» arhanizatary adznačyli:
- Pieršaja volnaja placoŭka na zavodzie «Haryzont» dla tvorčych ludziej
- Načnoje šeście ŭ skafandrach u Minsku (pryśviečanaje hurtu N.R.M.)
- Pieršaja biełaruskamoŭnaja nastolnaja hulnia «Razam»
- Humarystyčnaje šoŭ «Stendap-kaviarnia»
- Biełaruskamoŭnaja hulnia «Varta»
- Stvareńnie vyšymajki
- Mierapryjemstvy «Dzień vyšyvanki»
- Biełaruskamoŭny muzyčny kavier-bend
Biełaruskamoŭny kavier-bend «Art-siadziby».
«Art-siadziba» płanuje ŭ hetym hodzie zajavić siabie «pa-novamu», adnak adznačaje biaskoncyja admovy ŭ mierapryjemstvach dziaržaŭnymi orhanami. «My prapanoŭvali Ministerstvu Kultury, što možam zrabić dni vyšyvanak i śviaty rodnaj movy, hod kultury ž. Dyk namieśnik ministra adkazała nam, što ŭ ich svaje mierapryjemstvy, vy nie padychodzicie».
U płanach «Art-siadziby» praviadzieńnie dvuch bujnych mierapryjemstvaŭ — «Kaho lubiš? Lublu Biełaruś!» i «Dzień Vyšyvanki». Ź pieršym pakul jość peŭnyja prablemy. «Art-siadziba» sprabavała damovicca z praviadzieńniem fiestyvalu «Kaho lubiš? Lublu Biełaruś!» u minskim Pałacy sportu, ale tam źnianacku znajšli etylenhlikol? i praviadzieńnie fiestyvalu stała niemahčymym. Treci pa liku fiestyval «Dzień Vyšyvanki» płanujecca da praviadzieńnia letam, bližej da Kupalla. Hetym razam fiestyval płanujecca pravieści na adkrytym pavietry, u minskim Parku Horkaha.
Taksama ŭ płanach «Art-siadziby» praviadzieńnie Vialikaha Śpieŭnaha schodu razam ź inicyjatyvaj «Śpieŭny schod». Mierapryjemstva maje adbycca viasnoju. Płanujecca kala tysiačy ŭdzielnikaŭ. «Art-siadziba» praciahnie vyrab novych biełaruskich nastołak, płanujecca vypusk sieryi knih-razmalovak z aŭtarskimi malunkami, pierapracavanymi vycinankami i vieršami biełaruskich paetaŭ.
Pavał Biełavus adznačyŭ, što ich natchniła majka LSTR ź Dziedam-Baradziedam, tamu jany płanujuć vypuścić cacku biełaruskamoŭnaha piersanaža 90-ch. «Budzie ŭsiaho try cacki — Dzied-Baradzied, Paca-Vaca, a na treciuju cacku my praviadziom konkurs i abiarem najlepšuju».
Płanujucca novyja śpiektakli, adzin ź ich — «Francišak», pryśviečany baćku biełaruskaha teatru — Francišku Alachnoviču. «Art-siadziba» płanuje adpravicca ŭ 6 kropak pa Biełarusi da aŭtentyčnych narodnych majstroŭ, jakija stvarajuć mastackija pradmiety i nacyjanalnyja simvały.
Ciapier kulturnaja placoŭka rychtuje muzyčny šoŭ-prajekt, nakiravany na prasoŭvańnie nacyjanalnaj kultury praz sučasnuju muzyku, pad nazvaj «Radzim daje!». Padrabiaznaści «Art-siadziba» płanuje raspavieści paźniej.
Pačynajučy z 19:00 na scenie «Loft» pačnuć vystupać:
— kavier-bend «Art-siadziby»;
— hurt «Amplituda śmiełaści»;
— hurt «Čas łajna»;
— hurt «AMAROKA»;
— hurt «Martin S».
A ŭnačy u jakaści dy-džeja vystupić rep-vykanaŭca VINSENT, jaki budzie hrać da samaj ranicy.
Uvachod:
— 100 tys.;
— u vopratcy z nacyjanalnymi biełaruskimi simvałami i ŭzorami volny.
Kłub «Loft» (vulica Pietrusia Broŭki, 22).
