U miežach baraćby ź niezakonnym rybałoŭstvam Dziaržaŭnaja inśpiekcyja achovy žyviolnaha i raślinnaha śvietu pry prezidencie maje namier chadajničać ab uviadzieńni štrafaŭ za zachoŭvańnie zabaronienych pryład łoŭli, paviedamiŭ 23 sakavika na pres-kanfierencyi ŭ Minsku namieśnik načalnika viedamstva Alaksandr Duńkovič.
«My budziem chadajničać ab uviadzieńni štrafnych sankcyj za zachoŭvańnie zabaronienych pryład łoŭli doma, u haražy, u mašynie i inšych miescach i zbudavańniach, — skazaŭ jon. — Takaja adkaznaść praduhledžanaja ŭ našych prybałtyjskich susiedziaŭ. My budziem prapracoŭvać hetaje pytańnie».
Akramia taho, adznačyŭ Duńkovič, inśpiekcyja prapanuje Ministerstvu pryrodnych resursaŭ i achovy navakolnaha asiarodździa zabaranić vykarystańnie padčas viasnovaha nierastu pramysłovych pryład łoŭli na vadajomach, jakija pieradadzienyja ŭ arendu dla rybavodstva. Jak tłumačać inśpiektary, karystajučysia adsutnaściu zabarony, arandatary rybavodnych abjektaŭ u pieryjad nierastu aktyŭna vykarystoŭvajuć pramysłovyja pryłady łoŭli — sietki i nievad, što «vyklikaje abhruntavanuju niehatyŭnuju reakcyju hramadzian».
Z pačatku dziejańnia 1 sakavika zabarony na nierast pryrodaachoŭnaja inśpiekcyja vyjaviła ŭžo 140 parušeńniaŭ u śfiery rybnaj łoŭli, siem ź jakich mieli prykmiety kryminalnych dziejańniaŭ. Kanfiskavana bolš za 280 sietak daŭžynioj 13 km, pryblizna 50 inšych pryład łoŭli i bolš za 500 kh ryby.
Pradstaŭnik dziaržinśpiekcyi paviedamiŭ, što asabliva złosnym parušalnikam daviadziecca kampiensavać niemałyja sumy, bo «pryčynienaja imi škoda ŭ pieryjad zabarony vyličajecca ŭ trajnym pamiery». Tak, niadaŭnim parušalnikam treba budzie kampiensavać dziaržavie: u adnym vypadku pryblizna 130 młn rubloŭ, u druhim — 50 młn rubloŭ, u trecim — pryblizna 70 młn rubloŭ, u jašče adnym za vyłaŭlenych čatyroch asobin soma i ścierladzi, uniesienaj u Čyrvonuju knihu, — prykładna 18 młn rubloŭ. Pakolki ŭsie hetyja vypadki traplajuć pad dziejańnie kryminalnaha artykuła ab niezakonnym rybałoŭstvie, vinavatym budzie pryznačanaje dadatkovaje pakarańnie — ad bujnoha štrafu da abmiežavańnia voli, dadaŭ Duńkovič.
Za try miesiacy 2015 hoda dziaržinśpiektary praviali 1,5 tysiačy palavych kantrolnych mierapryjemstvaŭ, padčas kožnaha było vyjaŭlenaje jak minimum adno parušeńnie rybnaj łoŭli. Z hetych paŭtary tysiačy parušeńniaŭ 157 byli z prykmietami kryminalnych dziejańniaŭ. U parušalnikaŭ kanfiskavana 1.600 sietak ahulnaj daŭžynioj amal 70 km, prykładna 800 inšych zabaronienych pryład łoŭli i bolš za try tony niezakonna vyłaŭlenaj ryby.
Padčas pastajannych rejdaŭ na rynki krainy za apošnija try tydni za niezakonny handal sietkami i sietkamateryjałami inśpiektary pryciahnuli da adkaznaści siem pradaŭcoŭ. U pryvatnaści na rynku ŭ Ždanovičach zatrymany pradaviec, u jakoha byŭ kanfiskavany zabaronieny tavar: čatyry sietkavyja pryłady, u tym liku 128 roznakalibiernymi sietak ahulnaj daŭžynioj amal 7 km, 243 sietkavyja padjomniki-pavuki, 18 sietkavych ekranaŭ i t. d.
«Za adzin hety rejd było kanfiskavana stolki ž sietkavych pryład, kolki vyciahvaje z vadajoma, naprykład, Minskaja vobłaść za try miesiacy, — skazaŭ jon. — Lepš kanfiskavać ich ciapier, čym potym vyciahnuć z vadajomaŭ z zahinułaj rybaj».
