Na adkryćci Muzieja savieckaj akupacyi, u centry — ministr abarony Małdovy Anatoł Šałaru (fota: ava.md)
U Centry vajennaj kultury i historyi Nacyjanalnaj armii Małdovy ŭ minułyja vychadnyja adkryŭsia Muziej savieckaj akupacyi, paviedamlaje «Infotah». Muziej adkryty ź inicyjatyvy ministra abarony Anatoła Šałaru.
Na cyrymonii adkryćcia muzieja prysutničali ambasadar ZŠA ŭ Małdovie Džejms Peci, lidar Libieralnaj partyi Michaj Himpu, šerah dziaržaŭnych čynoŭnikaŭ i hramadskich dziejačaŭ.
Vystupajučy na cyrymonii adkryćcia, ministr Šałaru skazaŭ, što «pryjšoŭ pakłanicca prodkam, jakija stali achviarami złačynnaha režymu».
U ekspazicyi muzieja — 20 tysiač ekspanataŭ, uklučajučy fatahrafii, rečy departavanych žycharoŭ Małdovy, histaryčnyja dakumienty. Akramia dakumientalnych ekspanataŭ, u muziei jość zały, dzie abyhranaja abstanoŭka kabinietaŭ NKVD 40-ch hadoŭ minułaha stahodździa. U adnym z takich kabinietaŭ śledčy NKUS dapytvaje žycharku Biesarabii.
Na adkryćci ekspazicyi naviedvalnikaŭ sustrakaŭ čałaviek, zahrymavany pad pravadyra Kastryčnickaj revalucyi 1917 hoda Uładzimira Lenina.
Ministr abarony Šałaru paabiacaŭ adkryć muziej savieckaj akupacyi ŭ vieraśni minułaha hoda. Tady pa jaho zahadzie byŭ demantavany tank T-34, raźmieščany na terytoryi kišynioŭskaj motastrałkovaj bryhady «Štefan čał Mare». Ministr u zvarocie da ŚMI zaklikaŭ nie dramatyzavać padziei i zajaviŭ, što «demantaž tanka — heta zakanamiernaje imknieńnie vyrvać sumnuju staronku z historyi Małdovy i nahadać pra toje, jakija nastupstvy paciahnuła za saboj naša savieckaje minułaje».
Anatoł Šałaru taksama paviedamiŭ, što ŭ Małdovie jość jašče niekalki padobnych manumientaŭ i što jany taksama buduć demantavanyja i adpraŭlenyja ŭ Muziej savieckaj akupacyi.
