Bajkiery z supołki «Načnyja vaŭki», jakija źjaŭlajucca zaŭziatymi prychilnikami prezidenta Rasii Uładzimira Pucina, sioleta znoŭ pasprabujuć prarvacca z motaprabieham u Bierlin.
Reuters
Jak paviedamlaje ahienctva TASS, pra heta ŭ aŭtorak žurnalistam paviedamiŭ prezident motakłuba Alaksandr «Chirurh» Załdastanaŭ.
«Paśla paśpiachovaha marš-kidka ŭ minułym hodzie my chočam paŭtaryć jaho i ŭ hetym… Mahčyma, u budučyni heta naohuł stanie tradycyjaj — sustreča Dnia Pieramohi na kołach, na matacykłach», — skazaŭ jon.
Start kałony bajkieraŭ zapłanavany na 29 krasavika. Maršrut prabiehu lažyć praz terytoryju Rasii, Biełarusi, Polščy, Słavakii, Aŭstryi, Čechii i Hiermanii. Płanujecca, što motaprabieh zavieršycca 9 maja ŭ Bierlinie.
Załdastanaŭ zapeŭniŭ, što u hetym motaprabiehu budzie namnoha bolš udzielnikaŭ, čym u letašnim. Pry hetym jon paskardziŭsia, što sam nie zmoža pajechać u Jeŭropu, bo znachodzicca pad sankcyjami.
U svaju čarhu hałoŭny savietnik departamienta pa humanitarnym supracoŭnictvie i pravach čałavieka MZS RF Siarhiej Marozaŭ paviedamiŭ, što MZS RF svoječasova prainfarmavaŭ urady jeŭrapiejskich krain, pa darohach jakich płanujecca pravieści motaprabieh.
Zrešty, letašniuju sprobu motaprabiehu rasijskich bajkieraŭ pa ES naŭrad ci možna nazvać paśpiachovaj. Polšča i Litva admovilisia prapuścić «Načnych vaŭkoŭ» Pucina praź miažu.
U toj ža čas pradstaŭniki ruchu zapeŭnivali, što niekatorym ź ich usio ž udałosia prarvacca ŭ Jeŭropu.
Adnak bolš za ŭsio «jeŭrapiejski prabieh» pucinskich bajkieraŭ zapomniŭsia historyjaj z kaśmietyčkaj. Surovyja bajkiery paskardzilisia na ciažkija ŭmovy, pry jakich ich praviarali na miažy z Polščaj. «Načnych vaŭkoŭ» źniervavaŭ skrupulozny pieratrus ich asabistych rečaŭ, zładžany pamiežnikami.
«Ahladali daskanała, kožnuju škarpetku i kaśmietyčku, usie asabistyja rečy, usio rabili žorstka, choć i ŭ ramkach zakona», — skardzilisia tady bajkiery. Hetaja zajava vyklikała chvalu raznastajnych žartaŭ i fotažab u siecivie. Sami bajkiery paźniej zapeŭnivali, što kaśmietyčki naležali ich spadarožnicam.
