14 traŭnia Źmicier Vajciuškievič ładzić u Vilni kancertnuju prezientacyju alboma «Kamieta». U vizavaj padtrymcy MZS Litvy hetym razam admoviła, ale nie majučy mahčymaści vystupać na radzimie, vykanaŭca hatovy pracavać navat u takich umovach, kab pabačycca ź biełaruskim hledačom.
Albom «Kamieta» – adna z najbolš liryčnych i piaščotnych prac u abjomnaj dyskahrafii Vajciuškieviča, jakuju možna pastavić u adzin šerah z «Paravinami hodu» (2003) i «Tanha z ružaj» (2006). Novy dysk zapisany na słovy kultavaha češskaha paeta i barda Jaramira Nohavicy, jaki pačaŭ svaju karjeru na pačatku 80-ch i dahetul źbiraje zali pa 10-15 tysiač hledačoŭ u Čechii, Słavakii, Polščy.
– Heta vielmi miakki i liryčny albom – pra kachańnie ŭ roznych składanych abstavinach i roznym uzroście. Mienavita hetaja žyćciovaść u tekstach Nohavicy mianie vielmi padkupiła, – tłumačyć Źmicier. – U druhim adździaleńni vykanajem samyja liryčnyja pieśni ź inšych albomaŭ – budzie taki vialiki viasnovy kancert u pryhožaj zali haradskoj ratušy. Zdajecca, ź biełarusaŭ tam jašče nichto nie vystupaŭ.
Źmicier Vajciuškievič ź viasny 2011 hoda praktyčna nie maje mahčymaści vystupać na radzimie. Adziny za hety čas solny kancert adbyŭsia ŭ kastryčniku 2014 u DK MAZ. Da i paśla hetaha vystupy pa roznych pryčynach zryvalisia, u tym liku praz aficyjnyja admovy. Dajšło da taho, što ŭ lipieni 2015 Vajciuškievič atrymaŭ admovu sa spasyłkaj na ŭkaz №257, jaki zabaraniaje kancerty, što «ŭjaŭlajuć pahrozu nacyjanalnaj biaśpiecy, hramadskamu paradku, maralnaści i zdaroŭju nasielnictva, pravam i svabodam hramadzian».
– My dvojčy padavali zajavu na biaspłatnyja vizy ŭ MZS Litvy, ale abodva razy atrymali admovu biez tłumačeńniaŭ, – raspaviadaje Źmicier. – Ja chaču bačycca ź biełaruskimi hledačami, tamu niahledziačy na ŭsie abstaviny my robim hety kancert. Zała na 200 hledačoŭ, budzie vielmi ščyra i ŭtulna.
Źmicier Vajciuškievič z novym albomam «Kamieta»
14 traŭnia – Vilnia, Ratuša – 19.00
Kvitki: ad 275 000 da 450 000
Prodaž:
— Teatralnaja kasa (vuł. Kalinina, 5), z 10 da 19, teł.+375 29 331 69 66
— kasy i sajt Kvitki.by – kvitki.by
— kasy i sajt Bilietai.lt (Litva) - bilietai.lt
Infalinija: +375 29 628 4114
