Šancaŭ na toje, što hłabalnyja mety pa baraćbie z atłuścieńniem buduć dasiahnutyja da 2025 hoda, praktyčna niama, havorycca ŭ daśledavańni, apublikavanym u miedycynskim časopisie Lancet.
Za apošnija 40 hadoŭ (z 1975 pa 2014 hady) kolkaść darosłych ludziej, jakija pakutujuć ad zališniaj vahi, vyrasła z 105 da 641 miljona čałaviek, havorycca ŭ publikacyi. Dola toŭstych mužčyn za hety čas patroiłasia, a žančyn — padvoiłasia.
Pavodle vysnoŭ daśledčykaŭ, kolkaść ludziej u śviecie, jakija pakutujuć na atłuścieńnie, pieravysiła kolkaść žycharoŭ płaniety, jakija majuć niedachop vahi.
Kali ciapierašniaja tendencyja zachavajecca, to da 2025 hoda na atłuścieńnie buduć pakutavać 18% mužčyn i 21% žančyn.
Lekary charaktaryzujuć atłuścieńnie jak stan, pry jakim indeks masy cieła čałavieka (IMT, staŭleńnie masy cieła da kvadrata rostu) pieravyšaje 30.
Samaja vialikaja kolkaść toŭstych ludziej — u Kitai: u hetaj krainie na atłuścieńnie pakutujuć 43,2 młn mužčyn i 46,4 młn žančyn. Heta aznačaje, što 16,3% mužčyn z zališniaj masaj cieła — žychary Kitaja, kitajanki składajuć 12,4% žanočaha nasielnictva płaniety, jakoje pakutuje na atłuścieńnie. Na druhim miescy pa kolkaści ludziej z zališniaj masaj cieła — ZŠA.
Navukoŭcy miarkujuć, što adnymi miedycynskimi srodkami i viełasipiednymi darožkami na vulicach z prablemaj nie spravicca. U pryvatnaści, aŭtary daśledavańnia prapanujuć uładam enierhičniej uziacca za rehulavańnie cen na pradukty, jakija pravakujuć atłuścieńnie, a naŭzamien zrabić bolš dastupnymi zdarovyja pradukty.
Płany ŭrada Vialikabrytanii ŭvieści padatak na cukar, kab zrabić bolš ciažkadastupnymi hazavanyja biezałkaholnyja napoi, — heta krok u pravilnym kirunku, śćviardžajuć składalniki dakładu. Kožnaje piataje dzicia ŭ Brytanii pakutuje na atłuścieńnie. Pry hetym dzieci źjaŭlajucca asnoŭnymi spažyŭcami napojaŭ z vysokim utrymańniem cukru.
Praciŭniki padobnych mier śćviardžajuć, što dziaržavie nie varta dyktavać ludziam, što im jeści, i što ŭviadzieńniem novych padatkaŭ padobnyja prablemy nie vyrašajucca.
Letaś SAAZ pradstaviła dakład, u jakim havaryłasia, što da 2030 hoda ŭ Vialikabrytanii kala 75% mužčyn i bolš za 60% žančyn buduć pakutavać na atłuścieńnie.
