«Udzieł hramadzian Biełarusi ŭ bajavych dziejańniach na terytoryi inšych dziaržaŭ stvaraje pahrozu ŭciahvańnia respubliki va ŭzbrojenyja kanflikty va ŭron nacyjanalnym intaresam. Takaja situacyja niehatyŭna adbivajecca i na mižnarodnym imidžy našaj krainy», — zajaviŭ staršynia KDB Valeryj Vakulčyk, pradstaŭlajučy 4 krasavika ŭ Saviecie Respubliki prajekt zakona, jaki ŭstanaŭlivaje kryminalnuju adkaznaść u tym liku za ŭdzieł va ŭzbrojenych kanfliktach za miažoj.
Jak adznačyŭ kiraŭnik KDB, u adpaviednaści z Kanstytucyjaj i Kancepcyjaj Nacyjanalnaj biaśpieki Biełaruś pravodzić miralubivuju źniešniuju palityku i imkniecca da stvareńnia ŭmoŭ dla nabyćcia niejtralnaha statusu. Razam z tym jašče Haahskaj kanviencyjaj 1907 hoda ŭstanoŭlena, što dziaržava stračvaje status niejtralnaj, kali niejkaja asoba ź liku jaje hramadzian dobraachvotna ŭstupaje ŭ vojska vajujučych bakoŭ.
Vakulčyk kanstatavaŭ, što «ŭdzieł biełaruskich hramadzian u bajavych dziejańniach za miažoj u cełym nosić antysacyjalny charaktar, spryjaje farmiravańniu płasta śpiecyjalna padrychtavanych bajevikoŭ, jakija prajšli kroŭ».
U toj ža čas, pavodle jaho słoŭ, Kryminalny kodeks praduhledžvaje adkaznaść tolki dla najmitaŭ, heta značyć dla tych, chto vajuje vyklučna z karyślivaj zacikaŭlenaści. I heta nie dazvalaje pryciahnuć da adkaznaści hramadzian, jakija ŭdzielničajuć va ŭzbrojenych kanfliktach, pa idejnych i inšych mierkavańniach, a taksama ŭ vypadkach, kali niemahčyma dakazać ich materyjalnuju zacikaŭlenaść. Adsutnaść kryminalnaj normy taksama pieraškadžaje prafiłaktyčnaj pracy siarod hetaj katehoryi asob, skazaŭ staršynia KDB.
Vakulčyk paviedamiŭ, što zakonaprajekt praduhledžvaje ŭstaranieńnie hetaha prabiełu i ŭstanaŭleńnie kryminalnaj adkaznaści za ŭdzieł na terytoryi zamiežnaj dziaržavy va ŭzbrojenych kanfliktach navat pry adsutnaści prykmiety najomnictva — art. 361 prym. 3. Taksama praduhledžvajecca adkaznaść za viarboŭku i padrychtoŭku hramadzian, finansavańnie ci inšaje materyjalnaje zabieśpiačeńnie takoj dziejnaści.
«Uličvajučy, što hetyja złačynstvy mohuć učyniacca na terytoryi zamiežnaj dziaržavy, papiaredniaje śledstva prapanujecca adnieści da kampietencyi orhanaŭ dziaržaŭnaj biaśpieki», — udakładniŭ staršynia KDB.
«Padobnyja normy ŭ apošnija hady byli ŭviedzienyja ŭ kryminalnaje zakanadaŭstva mnohich krain SND. Pavodle danych našych kaleh, heta dazvoliła istotna źnizić kolkaść asob, jakija robiać sproby vyjechać na Blizki Uschod dla ŭstupleńnia ŭ IDIŁ», — kanstatavaŭ Vakulčyk.
Hladzi taksama: «My patryjoty, a nie najomniki» — biełarusy-dobraachvotniki pikietavali pasolstva ŭ Kijevie
