U Biełarusi budzie razhledžanaje pytańnie decentralizacyi sistemy dziaržkiravańnia, paviedamiŭ načalnik hałoŭnaha ekanamičnaha ŭpraŭleńnia Administracyi prezidenta, pamočnik prezidenta pa ekanamičnych pytańniach Kirył Rudy na pasiadžeńni kaardynacyjnaha savieta prajekta «Raźvićcio inkluziŭnaha miascovaha kiravańnia ŭ Respublicy Biełaruś» 8 krasavika ŭ Minsku.
Razam z tym Rudy adznačyŭ: «Kali siońnia skazać, što na miescach lepš vidać, davajcie častku paŭnamoctvaŭ damo na miescy, i jany sami ŭsio vyrašać, heta pryviadzie da chaosu. Kožny rehijon maje svaje pryjarytety, i jany mohuć supiarečyć nie tolki intaresam inšych rehijonaŭ, ale i ŭ cełym dziaržaŭnaj palitycy. Nie daj boh heta moža pryvieści da bankructva terytoryj, kali kožny rehijon budzie adstojvać svaje intaresy».
Ź inšaha boku, pradstaŭnik Administracyi prezidenta ličyć, što «ŭ sučasnym śviecie tak šmat infarmacyi, što čynoŭnik u centralnym aparacie nie zmoža ŭsio pieravaryć i pryniać uzvažanaje rašeńnie samastojna». Tamu pasyłam decentralizacyi budzie pieradača častki paŭnamoctvaŭ miascovym orhanam ułady. Dla hetaha «treba raspracavać dakładnuju praceduru, paradak taho, jak hetyja paŭnamoctvy buduć realizoŭvacca».
Havorka idzie pra padvyšeńnie funkcyjanalnaj i ekanamičnaj samastojnaści miascovych orhanaŭ ułady, skazaŭ Rudy, ale «budzie zachavany palityčny kantrol i centralizacyja».
Rudy vysoka acaniŭ rolu dziaržsłužačych u raźvićci krainy i ekanomiki. «Mienavita dziaržaŭnyja instytuty stvarajuć umovy, pry jakich raźvivajecca hramadstva», — skazaŭ jon.
Načalnik upraŭleńnia padkreśliŭ, što havorka idzie nie pra miechaničnaje skaračeńnie dziaržaparatu i źnižeńnie vydatkaŭ, a pra aptymizacyju funkcyj i padrychtoŭku kadraŭ. Pavodle jaho słoŭ, mienavita na vyrašeńnie hetych zadač nakiravany prajekt «Raźvićcio inkluziŭnaha miascovaha kiravańnia ŭ Respublicy Biełaruś», jaki pačali realizoŭvać Prahrama raźvićcia AAN, Administracyja prezidenta i Akademija kiravańnia pry prezidencie.
«Navučańnie — heta apieradžalny praces. Pad jaho pavinny być vystrajenyja i prahrama, i vučebnaja infrastruktura, jakaja budzie aryjentavacca na inkluziŭnaje kiravańnie, elektronny ŭrad», — skazaŭ Rudy.
Jon taksama adznačyŭ, što padbor kadraŭ na dziaržsłužbu pavinien vyklučać subjektyvizm, zasnavany na indyvidualnych rekamiendacyjach i parucy. «Tady dziaržaparat nie budzie pieramiaščacca ŭśled za źmienaj vysokich dziaržsłužačych, — skazaŭ Rudy, — a budzie prafiesijna zajmacca svajoj dziejnaściu i pierachodzić na bolš vysokija ŭzroŭni».
Rudy taksama adznačyŭ, što ŭ miežach prajekta budzie razhledžanaje pytańnie matyvacyi i padtrymki dziaržaŭnych słužačych. Akramia taho, u miežach prajekta «zastajecca rezierv dla taho, čaho my nie viedajem». «Pakul budzie realizoŭvacca prajekt, źjaviacca novyja vykliki, novyja prablemy, jakija treba budzie vyrašać», — zajaviŭ jon.
Prajekt «Raźvićcio inkluziŭnaha miascovaha kiravańnia ŭ Respublicy Biełaruś» raźličany na try hady i finansujecca Dackim ahienctvam pa mižnarodnym raźvićci (DANIDA) u pamiery kala 3 młn dalaraŭ.
