Traich marakoŭ, jakija źnikli na poŭdni Cichaha akijana, vyratavali dziakujučy słovu Help («Dapamažycie»), jakoje jany vykłali palmavymi listami na bierazie vyspy. Pra heta paviedamlaje havajskaje adździaleńnie Bierahavoj achovy ZŠA na svajoj staroncy ŭ fejsbuku.
Reuters
Maraki viečaram 4 krasavika adpravilisia ŭ trochhadzinnaje płavańnie na nievialikaj łodcy. Praź niekatory čas paśla adpłyćcia pačaŭsia štorm, i łodku pieraviarnuła vialikaja chvala.
Nadzieŭšy vyratavalnyja kamizelki, maraki nočču prapłyli dźvie mili (kala 3,5 km) da bližejšaj vyspy, jakaja akazałasia biaźludnaj.
5 krasavika ŭłady štata Čuuk (adzin z čatyroch Fiederatyŭnych štataŭ Mikranezii) paviedamili pra źniknieńnie marakoŭ Bierahavoj achovie ZŠA, jakaja padklučyłasia da pošukaŭ.
Bierahavaja achova zapytała dapamohu VMS ZŠA ź Japonii. U vyniku marakoŭ u čaćvier znajšoŭ ekipaž patrulnaha samalota Boeing P-8 Poseidon. Infarmacyju pra ich miescaznachodžańnie pieradali ŭładam Mikranezii. Za marakami vysłali łodku, jakaja dastaviła ich u štat Čuuk.
