Suśvietnaviadomy bajec Vital Hurkoŭ, jaki ŭ sakaviku čarhovy raz staŭ čempijonam Biełarusi pa muaj-taj, moža nie pajechać na čempijanat śvietu, jaki startuje 19 maja ŭ Šviecyi.
«Cikava, ci znojduć hrošy čynoŭniki ź Fiederacyi na spartoŭca, ad jakoha jany pazbavilisia z-za jaho muzyčnaj dziejnaści. Čas idzie, a jasnaści niama. Ci nam na kancertach skrynačku pastavić z nadpisam «Hurkovu na čempijanat»?» — napisaŭ spartsmien u adkrytaj supołcy ŭ Viber.
Nahadajem, što sioleta ŭ sakaviku bajec, jaki taksama zajmajecca muzykaj, prapuściŭ niekalki hastrolaŭ u składzie hurtu Brutto, viarnuŭsia na rynh i ŭpeŭniena pieramoh na čempijanacie Biełarusi pa muaj-taj. Akurat na hetych spabornictvach adbirali ŭdzielnikaŭ suśvietnaha pieršynstva. Zdavałasia b, dziesiacirazovy čempijon płaniety i suśvietnaja zorka muaj-taj Vital Hurkoŭ pavinien być adnym ź pieršych u śpisie kandydataŭ na pajezdku ŭ Šviecyju.
Prosim bajca patłumačyć situacyju. Ciaham hutarki vyśviatlajecca, što dziaržava ŭžo nie płacić Zasłužanamu majstru sportu zarpłatu.
«Raniej ja byŭ na staŭcy ŭ Ministerstvie sportu. Štomiesiac atrymlivaŭ zarpłatu, a da taho ž viedaŭ, što na mianie zaŭždy jość finansavańnie. Ale niekatoryja členy Biełaruskaj fiederacyi muaj-taj i kikboksinhu vytravili mianie sa štatnaj kamandy. Tamu na moj vyjezd treba šukać dadatkovyja hrošy, i ciapier maja pajezdka na čempijanat — pad pytańniem. Finansavańnie dahetul nie znajšli. Choć ja ŭ dobraj formie. Biez pytańniaŭ pieramoh na čempijanacie Biełarusi, choć adpracavaŭ akuratnieńka, kab znoŭ adčuć rynh i pradychacca. Tamu što paśla traŭmy ŭ mianie bajoŭ nie było», — raskazaŭ Hurkoŭ u intervju Jeŭraradyjo.
Jak ža atrymałasia, što Hurkoŭ bolš nie staić na staŭcy ŭ Minsportu?
«Aficyjna ja syšoŭ pa zhodzie bakoŭ, — tłumačyć Hurkoŭ. — Usio pačałosia z taho času, jak ja staŭ vystupać u składzie Brutto. Spačatku heta ŭsim padabałasia. Da taho ž, usie viedali pra maju pazicyju nakont prasoŭvańnia biełaruskaj movy i ŭdziełu ŭ kulturnym žyćci krainy. Padčas hastrolaŭ ja braŭ adpačynak pa ŭłasnym žadańni i vyjazdžaŭ. Muzyčnaja dziejnaść nie pieraškodziła mnie pieramahčy na čempijanacie Jeŭropy. Potym ja čarhovy raz staŭ čempijonam Biełarusi, pavinien byŭ jechać na čempijanat śvietu — 2015, ale traŭmavaŭsia. U toj čas źmianiŭsia staršynia Fiederacyi muaj-taj i kikboksinha. Im staŭ hienierał-major unutranych vojsk MUS Juryj Karajeŭ, čałaviek novy. Hetym, napeŭna, skarystalisia niedobrazyčliŭcy. Na adnym z pasiadžeńniaŭ Fiederacyi abmiarkoŭvali artykuły z raznastajnych sajtaŭ. Byŭ tam i moj fotazdymak z kapaj, na jakoj vyjaŭlena «Pahonia». Situacyju vystavili tak, što ŭ zbornaj vorah, ledźvie nie ekstremist i apazicyjanier. Mianie doŭha schilali napisać zajavu pa ŭłasnym žadańni. Ja hetaha nie zrabiŭ. U vyniku my damovilisia z Karajevym, što ja dapracuju da kanca kantrakta i sydu. U Minsportu majmu rašeńniu byli ščyra ździŭlenyja, prapanoŭvali zastacca. Ale rašeńnie ŭžo było pryniataje.
Vital Hurkoŭ vymušany byŭ pajści na taki krok, bo jamu skazali, što nie buduć padpisvać sacyjalnych adpačynkaŭ i, takim čynam, jon nie zmoža vyjazdžać na kancerty.
Vital Hurkoŭ adznačaje, što jamu nie adnojčy vykazvali pretenzii za histaryčnyja pieraposty ŭ fejsbuku. Z hałoŭnym trenieram Ściapanavym nakont hetaha była sprečka. Jaho pazicyja takaja, što ŭsie my savieckija ludzi. Ja ros užo ŭ niezaležnaj Biełarusi i savieckim čałaviekam siabie nie liču. Druhi momant, u prezidyumie Fiederacyi źjavilisia niezrazumiełyja ludzi, jakija, jak mnie stała viadoma ad taho ž Ściapanava, sočać za maimi pierasoŭvańniami, manitorać internet i źbirajuć na mianie kampramat. Čałaviek, pra jakoha ja kažu, sprabavaŭ dyskredytavać mianie fotazdymkam ź internetu, na jakim bačnaja maja kapa z «Pahoniaj». U toj ža čas jon, liču, nie maje paniaćcia, što takoje trenirovačny praces i muaj-taj. Čamu takich ludziej staviać u kiraŭnictva Fiederacyi, nie razumieju. Ale jany zajmajuć miesca samych aŭtarytetnych trenieraŭ, jakija kujuć vynik, dla jakich muaj-taj — heta nie pahulacca, a žyćcio.
Sam Vital Hurkoŭ ličyć, što našy nacyjanalnyja simvały nie treba palityzavać: «Jany naležać biełaruskamu narodu, heta častka našaj historyi. Takoha mierkavańnia prytrymlivajecca, napeŭna, kožny adekvatny čałaviek. Niadaŭna hetu temu abmiarkoŭvali navat u prahramie «Kłub redaktaraŭ» pa Pieršym nacyjanalnym. Kankretna mianie «Pahonia» matyvuje, dapamahaje pieramahać», — dadaje Hurkoŭ.
Vital Hurkoŭ ličyć siabie zdolnym pieramahčy na nastupnym čempijanacie śvietu.
Što datyčyć hurtu Brutto, to navat padčas hastrolaŭ ja praciahvaju trenirovačny praces i pravodžu majstar-kłasy. «Kali ja vychodžu na rynh, značycca, ja ŭpeŭnieny, što znachodžusia ŭ naležnaj formie», — kaža Hurkoŭ.
U svaju čarhu, hałoŭny trenier zbornaj biełaruskich tajbaksioraŭ Michaił Ściapanaŭ tłumačyć prablemy Hurkova tym, što ŭ alimpijski hod jość prablemy ź finansavańniem i tamu vielmi pilna padychodziać da pytańnia vybaru ŭdzielnikaŭ čempijanatu śvietu.
«My adpravim na čempijanat śvietu najmacniejšych. Vital Hurkoŭ i trenirujecca, i śpiavaje. Kali ja pabaču jaho na zborach, stanie zrazumieła, ci jość sens vieźci jaho na čempijanat śvietu. Mnie nie zusim spadabałasia, jak jon vystupiŭ na čempijanacie Biełarusi. Jon byŭ troški macniejšy za druhoha numara zbornaj, ale ja nie skazaŭ by, što na hałavu. Kančatkovaje rašeńnie budzie prymać prezidyum Fiederacyi», — kaža Ściapanaŭ.
Skandalnuju situacyju z vyklučeńniem Hurkova sa składu štatnaj kamandy tajbaksioraŭ trenier tłumačyć asabistym vybaram bajca i jaho muzyčnaj dziejnaściu ŭ hurcie Brutto: «Ź im była praviedziena hutarka: vybiraj, sportam budzieš zajmacca ci muzykaj. Nichto jaho nie vytraviŭ, jon syšoŭ sam. Da hetaha prapuściŭ čempijanat śvietu ŭ Tajłandzie».
Adnosna taho, što Hurkoŭ tady byŭ traŭmavany, Michaił Ściapanaŭ adznačaje: »Da našaha doktara jon nie źviartaŭsia. A padčas čempijanatu śvietu pajechaŭ u Łondan skakać z «Lapisam Trubiackim»» na scenie»
Varta adznačyć, adnak, što čempijanat prachodziŭ z 13 da 23 žniŭnia, a Hurkoŭ vystupaŭ u Łondanie praz dva miesiacy, 18 kastryčnika.
Zrešty, sam čempijon zapeŭnivaje, što pierad čempijanatam śvietu-2015 prachodziŭ kurs lačeńnia i maje ŭsie miedycynskija dakumienty. A dla kancertu ŭ Łondanie napisaŭ zajavu na adpačynak, jakuju zaviziravaŭ toj samy Michaił Ściapanaŭ.
Kiraŭnik Fiederacyi Juryj Karajeŭ i Michaił Ściapanaŭ.
U Minsportu zajavy Vitala Hurkova stali niečakanaściu.
Dakładna viadoma, što ŭ dadzieny momant Hurkoŭ uvachodzić u tak zvany pieramienny skład zbornaj. Uvachodzić u pastajanny skład jon nie moža tolki tamu, što nie staić na staŭcy ŭ Minsportu.
«Pytańnie tolki ŭ finansach — udasca znajści dla Hurkova hrošy na čempijanat śvietu ci nie ŭdasca», — adznačyli Jeŭraradyjo ŭ Minsportu.
Biudžet na pajezdku tajbaksioraŭ u Šviecyju raźličvaŭsia ŭ rublach. Ad taho času naša valuta asłabła, a raźličvacca z arhanizatarami pieršynstva treba ŭ jeŭra. U tym liku i tamu hrošaj nie chapaje, tłumačać u ministerstvie.
Akramia taho, bolšaść srodki kinutyja na Alimpijadu-2016. Muaj-taj choć i papularny vid sportu, ale nie ŭvachodzić u alimpijskuju prahramu, tamu Fiederacyja sutyknułasia ź niaprostaj zadačaj znajści poŭnaje finansavańnie na pajezdku nacyjanalnaj kamandy.
Vital Hurkoŭ — adzin z samych tytułavanych bajcoŭ va ŭsioj historyi čempijanataŭ śvietu pa muaj-taj. Jon taksama zdabyŭ vialikuju papularnaść u hramadstvie dziakujučy svajoj dziejnaści pa padtrymcy nacyjanalnaj kultury i movy.
«Ciapier nie toj momant, kab raździalać biełarusaŭ na prychilnikaŭ bieł-čyrvona-biełaha ci čyrvona-zialonaha ściahoŭ. Treba abjadnoŭvacca i razam vyrašać składanaści, ź jakimi sutyknułasia kraina. Tyja ludzi, jakija siońnia biełarusaŭ raźjadnoŭvajuć, pa vialikim rachunku bjuć pa suvierenitecie krainy», — kaža Hurkoŭ.
