Kasmanaŭt Alaksiej Lavonaŭ raspavioŭ telekanału «Źviezda» svaju viersiju hibieli Juryja Haharyna. Pra heta paviedamlajecca na sajcie kanała.
Fota: imago stock&people / Globallookpress.com
27 sakavika 1968 hoda, u dzień hibieli Haharyna, Lavonaŭ znachodziŭsia na aeradromie Kiržač Uładzimirskaj vobłaści, adkul pieršy ŭ śviecie kasmanaŭt vylecieŭ na samalocie MiH-15UTI.
Praź niekatory čas z aeradroma pačuli vybuch. «My stajali kala KDP [kamandna-dyśpietčarskaha punkta] i pačuli dvajny vybuch i zvyšhuk. Intervał pamiž vybucham i zvyšhukam byŭ paŭtary-dźvie siekundy», — raspavioŭ kasmanaŭt. Lavonaŭ i prysutnyja pry hetym inšyja lotčyki adrazu vyrašyli, što krynica zvyšhuku — adzin abjekt, a vybuch — inšy.
U aficyjnym zaklučeńni pryčynaj krušeńnia MiH-15 nazvali zbližeńnie i rezkaje ŭchileńnie ad inšaha samalota, adnak sapraŭdnym vinavatym Lavonaŭ ličyć toj nieviadomy samalot. «Adnaznačnaj pryčynaj hibieli staŭ lotčyk, jaki apuściŭsia nižej za 400 mietraŭ pad abłoki, uklučyŭ farsaž i prajšoŭ pobač, nie pabačyŭšy Haharyna. Heta byŭ samalot Su-15, jon prajšoŭ na adlehłaści 10-15 mietraŭ na chutkaści huku, uzburanym patokam pierakuliŭ samalot Haharyna», — zajaviŭ kasmanaŭt.
Lavonaŭ taksama zhadvaŭ list, napisany ŭdzielnikami rasśledavańnia. U im była prośba nie afišavać abstaviny trahiedyi, kab nie padviarhać represijam lotčyka Su-15, padnačalenaha Andreja Tupaleva.
Aficyjnyja vysnovy kamisii, jakaja rasśledavała heta zdareńnie, byli takija: ekipaž (Haharyn i lotčyk-instruktar Uładzimir Siarohin) z-za źmienienaj pavietranaj abstanoŭki (padrabiaznaści nie ŭdakładnialisia) ździejśniŭ rezki manieŭr i sarvaŭsia ŭ štopar. Niahledziačy na sproby lotčykaŭ vyvieści mašynu ŭ haryzantalny palot, samalot sutyknuŭsia ź ziamloj, ekipaž zahinuŭ. Adsutnaść vyraznaj apublikavanaj aficyjnaj viersii i abjektyŭnych dokazaŭ sparadziła mnostva zdahadak i nieaficyjnych viersij hibieli lotčykaŭ.
