Papa Rymski Francišak, jaki naviedaŭ łahier biežancaŭ na hrečaskaj vyśpie Lesbas, uziaŭ z saboj u Vatykan 12 siryjskich mihrantaŭ.
Členy troch siemjaŭ, uklučajučy šaściarych dziaciej, padnialisia pa trapie na bort samalota, na jakim kiraŭnik Rymska-katalickaj carkvy prylacieŭ u Hrecyju.
U zajavie Vatykana havorycca, što Francišak chacieŭ zrabić žest «vietlivaści i haścinnaści» ŭ adnosinach da biežancaŭ.
Paśla pahadnieńnia, dasiahnutaha ŭ minułym miesiacy pamiž ES i Turcyjaj i zaklikanaha pamienšyć patok biežancaŭ u Jeŭropu, tysiačy mihrantaŭ apynulisia «pad zamkom» na hetym vostravie.
Raniej Papa Francišak pastaraŭsia ŭsialić nadzieju ŭ nasielnikaŭ łahiera, źviarnuŭšysia da ich sa słovami: «Vy nie samotnyja». Razam z tym jon zaklikaŭ uvieś śviet prajavić «prostuju humannaść» padčas mihracyjnaha kryzisu
U łahiery Moryja znachodziacca bolš za 3 tysiačy čałaviek, niekatorych ź ich moža čakać departacyja ŭ Turcyju.
Vatykan nastojvaje, što vizit Papy nosić vyklučna humanitarny i relihijny charaktar, i što jaho nie varta razhladać jak krytyčnuju pazicyju kiraŭnika katalickaj carkvy ŭ dačynieńni da rašeńnia ŭładaŭ ES ab masavaj departacyi biežancaŭ.
Sumnaja pajezdka
Dziasiatki nasielnikaŭ łahiera Moryja vyjšli nasustrač pantyfiku, niekatoryja trymali ŭ rukach płakaty z nadpisami, jakija zaklikajuć akazać im dapamohu.
Spačatku Papa sustreŭsia z hrupaj chłopčykaŭ, jakija adpravilisia ŭ niebiaśpiečny šlach da bierahoŭ Hrecyi biez supravadžeńnia darosłych. Telekamiery pakazali, jak padčas abychodu Papam łahiera adna ź biežanak uklenčyła pierad im, źviarnuŭšysia da jaho z emacyjnaj pramovaj.
Maleńkaja dziaŭčynka padaryła Francišku svoj malunak. Sa słovami «Brava, brava» jon pieradaŭ jaho pamočnikam, skazaŭšy: «Nie zhortvajcie jaho. Ja chaču, kab jon byŭ na maim stale».
U svajoj pramovie Papa pryznaŭ, što nasielniki łahiera pajšli na vielizarnyja achviary. Jon skazaŭ, što chacieŭ by pryciahnuć uvahu ŭsiaho śvietu da hetaha surjoznaha humanitarnaha kryzisu.
Źviartajučysia da biežancaŭ, kiraŭnik Rymska-katalickaj carkvy skazaŭ: «Nie hublajcie nadziei. Samy vialiki dar, jaki my možam prapanavać adno adnomu — heta luboŭ».
Raniej, na borcie samalota, jaki nakiroŭvaŭsia na Lesbas, Papa skazaŭ žurnalistam: «Hetaja pajezdka adznačana asablivym smutkam … My staniem śviedkami samaj žudasnaj humanitarnaj katastrofy z časoŭ Druhoj suśvietnaj vojny».
«My ŭbačym mnohich ludziej, jakija pieranosiačy pakuty, vymušanyja biehčy i jakija nie viedajuć, kudy nakiravać svaje stupni. My taksama nakiroŭvajemsia da mora, što pieratvaryłasia ŭ mohiłki. Tak šmat ludziej nie dabralisia da bieraha», - skazaŭ jon.
Papu sustreli na Lesbasie premjer-ministr Hrecyi Aleksis Cypras, patryjarch Kanstancinopalski Varfałamiej i archijepiskap Afinski i ŭsiaje Hrecyi Jeranim II.
U svaim vystupie ŭ łahiery Moryja Papa skazaŭ biežancam: «Śviet nie zabyŭsia pra vas. Ab śviecie buduć sudzić pa tym, jak jon pastavicca da vas».
