Palicyja Irana stvaraje śpiecyjalnaje padraździaleńnie, supracoŭniki jakoha pad vyhladam zvyčajnych hramadzian buduć sačyć za pavodzinami žycharoŭ na vulicach Tehierana.
Adna z asnoŭnych zadač hetaj palicyi noravaŭ — adsočvańnie taho, nakolki staranna žančyny vykonvajuć na vulicy pradpisańnie pakryvać hałavu.
U iranskaj stalicy za pavodzinami žycharoŭ buduć nazirać 7000 ahientaŭ.
Pa słovach hienierała Chusejna Sadžadinija, «patruli buduć supraćstajać niajaŭnym parušeńniam paradku». U tym liku, pa słovach hienierała, palicyja noravaŭ budzie źviartać asablivuju ŭvahu na parušalnic paradku, u jakich chidžab prysutničaje vyklučna simvalična.
Taksama parušeńniem ličycca, kali žančyna źniała chustku z hałavy, znachodziačysia ŭ aŭtamabili. Akramia hetaha, patruli pavinny nie dapuskać prystavańnie da žančyn na vulicach i nie dapuskać šumnych schodaŭ.
Novaja palicyja noravaŭ, jak paviedamlajecca, nie pavinna adkryta ŭmiešvacca ŭ situacyju, adnak ahienty pavinny źbirać infarmacyju i paviedamlać pra parušalnikaŭ u inšyja palicejskija padraździaleńni.
Z časoŭ isłamskaj revalucyi voś užo 35 hadoŭ žančynam u Iranie zabaroniena pakidać dom biez chustki na hałavie.
Pytańnie ab našeńni chidžabaŭ vyklikaje burnyja debaty ŭ krainie, pryčym prychilniki chidžabaŭ taksama davoli šmatlikija i pakul nie hatovyja zdavać pazicyi.
Žurnalistka ź Irana Masich Aliniedžad zasnavała hrupu ŭ fejsbuku, dzie ŭ znak pratestu suprać našeńnia chidžaba žančynam prapanujecca raźmiaščać svaje fatahrafii bieź isłamskich chustak.
Kampaniju suprać praviła, jaki abaviazvaje iranskich žančyn nakryvać hałavu, padtrymali i inšaziemki.
Anłajn-ruch My Stealthy Freedom («Maja tajemnaja svaboda») pačaŭ kampaniju suprać chidžaba dva hady tamu: hrupa zaklikała turystak, jakija vyrašyli naviedać Iran, sfatahrafavacca tam biez hałaŭnoha ŭboru i vykłaści hetyja fatahrafii ŭ sieciva.
Z taho času ŭ siecivie źjavilisia dziasiatki fotazdymkaŭ iranskich žančyn, jakija, ryzykujučy aryštam, źnialisia na ludziach biez chidžaba.
