U Biełarusi vyznačany paradak pryjomu na alternatyŭnuju słužbu i ŭmovy jaje prachodžańnia. Adpaviednaje rašeńnie źmieščana ŭ pastanovie Savieta Ministraŭ ad 18 krasavika 2016 hoda numar 312, paviedamili ŭ pres-słužbie ŭrada.
Dakumient pryniaty ŭ metach pryviadzieńnia narmatyŭnaj pravavoj bazy ŭ adpaviednaść z zakonam «Ab alternatyŭnaj słužbie» ad 4 červienia 2015 hoda.
Prachodziačy alternatyŭnuju słužbu, hramadzianie buduć vykonvać raboty ŭ arhanizacyjach achovy zdaroŭja, žyllova-kamunalnaj, lasnoj i sielskaj haspadarki, sacyjalnaj śfiery, arhanizacyjach, jakija zajmajucca dobraŭparadkavańniem terytoryj. Jany taksama buduć pryciahvacca da ramontu čyhunačnych puciej i aŭtadaroh. Akramia taho, im možna budzie pracavać u orhanach i padraździaleńniach MNS.
Čas prachodžańnia hramadzianami alternatyŭnaj słužby zaličvajecca ŭ staž pracy.
Praduhledžana, što Ministerstva pracy i sacyjalnaj abarony ŭstanaŭlivaje pieralik arhanizacyj, u jakich hramadzianie prachodziać alternatyŭnuju słužbu, a taksama formy pradpisańnia dla prachodžańnia alternatyŭnaj słužby, paśviedčańni i formu ŭlikovaj kartki hramadzianina, jaki prachodzić takuju słužbu.
Pastanova taksama zamacoŭvaje paradak i ŭmovy pradastaŭleńnia hramadzianam, zvolnienym z alternatyŭnaj słužby, pieršaha pracoŭnaha miesca.
Akramia taho, vyznačany paradak praviadzieńnia vajenna-ŭračebnaj ekśpiertyzy. Pravamoctvy pravodzić jaje dla vyznačeńnia katehoryi hodnaści hramadzian pradastaŭleny vajenna-ŭračebnym kamisijam.
Vyznačany ahulnyja pałažeńni arhanizacyi i praviadzieńnia miedycynskaha ahladu hramadzian, jakija prachodziać alternatyŭnuju słužbu. Ustanoŭlena, što taki ahlad pravodzicca pa nakiravańni orhana pa pracy, zaniataści i sacyjalnaj abaronie pa miescy znachodžańnia arhanizacyi, u jakoj hramadzianin budzie słužyć.
Paradak nakiravańnia na miedycynski ahlad, formy dakumientaŭ, nieabchodnych dla nakiravańnia, i paradak ich afarmleńnia ŭstanaŭlivajucca Minpracy i sacabarony sumiesna ź Ministerstvam achovy zdaroŭja pa ŭzhadnieńni ź Minabarony.
Arhanizacyja praviadzieńnia miedycynskaha ahladu hramadzian uskładajecca na vajennaha kamisara (kiraŭnika adasoblenaha padraździaleńnia vajennaha kamisaryjata) rajona (horada) pa miescy prachodžańnia hramadzianinam słužby. Miedycynski ahlad pravodziać daktary-śpiecyjalisty, uklučanyja ŭ skład lakarskich kamisij z pravami vajenna-ŭračebnych kamisij vajennych kamisaryjataŭ (adasoblenych padraździaleńniaŭ vajennych kamisaryjataŭ) rajonaŭ (haradoŭ): doktar-chirurh, doktar-terapieŭt, doktar-nieŭrołah, doktar-aftalmołah, doktar-otarynałarynhołah i pry nieabchodnaści — daktary inšych śpiecyjalnaściej.
Dla ŭdakładnieńnia dyjahnazu hramadzianin, jaki prachodzić alternatyŭnuju słužbu, moža być nakiravany ŭ dziaržaŭnuju arhanizacyju achovy zdaroŭja na miedycynskaje abśledavańnie ŭ ambułatornych abo stacyjanarnych umovach. Pry hetym patrabavańni da stanu zdaroŭja anałahičnyja patrabavańniam, što pradjaŭlajucca ŭ adnosinach da hramadzian, jakija prachodziać terminovuju vajennuju słužbu i słužbu ŭ reziervie.
