Ministerstva achovy zdaroŭja Biełarusi nie płanuje dazvalać prodaž lekaŭ praź internet i viendynhavyja aparaty, paviedamiła načalnik upraŭleńnia farmaceŭtyčnaj inśpiekcyi i arhanizacyi lekavaha zabieśpiačeńnia Ministerstva achovy zdaroŭja Biełarusi Ludmiła Ravuckaja na źjeździe farmaceŭtyčnych rabotnikaŭ, jaki prachodzić siońnia ŭ Biełaruskim dziaržaŭnym miedycynskim univiersitecie.
Ludmiła Ravuckaja adznačyła, što ŭ ciapierašni čas usio čaściej možna pačuć prapanovy, asabliva ad prychilnikaŭ pieradavych technałohij u handli, ab arhanizacyi internet-aptek abo ab realizacyi lekaŭ praź śpiecyjalnyja aŭtamaty. Na dadzieny momant dziejnaść internet-aptek u Biełarusi nie dazvolenaja. «U ciapierašni čas nie płanujecca vydača dazvołaŭ ni na adkryćcio internet-aptek, ni viendynhavych aparataŭ pa prodažy lekaŭ», — skazała jana.
Prodaž lekaŭ spałučany z mahčymaj niebiaśpiekaj nielehalnaha raspaŭsiudžvańnia zabaronienych tavaraŭ, a taksama falsifikacyi miedycynskaj pradukcyi, što ŭ ciapierašni čas źjaŭlajecca hłabalnaj suśvietnaj prablemaj. «Ministerstva achovy zdaroŭja Biełarusi padzialaje zaniepakojenaść hetaj niebiaśpiekaj, asabliva niebiaśpiekaj nierehulavanaha raźvićcia internet-handlu lekavymi srodkami», — skazała načalnik upraŭleńnia.
Pry hetym aptečnyja arhanizacyi ŭsich formaŭ ułasnaści respubliki mohuć karystacca mahčymaściami internetu dla padtrymańnia ŭłasnych sajtaŭ u jakaści infarmacyjnaha resursu dla nasielnictva pra svaju dziejnaść. Na sajtach aptek, u pryvatnaści, raźmiaščajecca infarmacyja ab najaŭnaści nieabchodnych lekavych srodkaŭ. U aptekach RUP «Biełfarmacyja» šyroka vykarystoŭvajecca pasłuha papiaredniaj internet-zamovy.
