Arhanizatary «Čarnobylskaha šlachu» majuć namier patrabavać na akcyi, jakaja adbudziecca 26 krasavika ŭ Minsku, nieadkładnaha spynieńnia budaŭnictva AES u Astraŭcy. Pra heta jany zajavili ŭ piatnicu na pres-kanfierencyi ŭ Minsku.
Arhanizatary akcyi taksama majuć namier patrabavać ad uładaŭ raskryćcia poŭnaj infarmacyi pra nastupstvy avaryi na Čarnobylskaj AES u Biełarusi, spynieńnia haspadarčaha asvajeńnia i zasialeńnia zabrudžanych terytoryj, a taksama zabieśpiačeńnia sistemnaha i dastupnaha hramadzianam radyjałahičnaha kantrolu na ŭsioj terytoryi krainy.
Akramia taho, arhanizatary majuć namier patrabavać vyvadu z krainy rasijskich samalotaŭ, jakija zdolnyja nieści na borcie taktyčnaje jadziernaje ŭzbrajeńnie; a taksama vykonvać niejtralny biaźjadzierny status, admoviŭšysia ad płanaŭ pa raźmiaščeńni na terytoryi Biełarusi zamiežnych vajennych baz.
Inicyjatary akcyi buduć patrabavać ad uładaŭ praviadzieńnia demakratyčnych reformaŭ, zabieśpiačeńnia svabody słova, schodaŭ, stvareńnia hramadskich arhanizacyj i palityčnych partyj, svabodnych i prazrystych vybaraŭ.
Usie hetyja patrabavańni ŭtrymlivajucca ŭ rezalucyi, jakuju budzie prapanavana ŭchvalić udzielnikam «Čarnobylskaha šlachu».
U dakumiencie taksama adznačajecca, što za 30 hadoŭ u Biełarusi pamiać pra katastrofu na ČAES «staranna ścirali, historyju pierapisvali». «Ułady Biełarusi nadziejna zachoŭvajuć tajamnicu nastupstvaŭ Čarnobyla, i za 30 hadoŭ biełaruskaja zabrudžanaja ziamla stała dla navukoŭcaŭ, ekśpiertaŭ i ekołahaŭ śvietu tera inkohnita», — havorycca ŭ rezalucyi.
Zaraz, adznačajecca ŭ dakumiencie, ułady «budujuć druhi Čarnobyl — Astravieckuju AES, jaki pa svaich maštabach moža pierasiahnuć pieršy, pahražajučy pieratvaryć unikalnaje Biełaruskaje Paazierje ŭ radyjeaktyŭnuju pustku».
«My chočam skazać «chopić!» jadziernamu hienacydu našaha naroda, «davoli!» chłuśni i dakučlivaj prapahandzie, «stop!» budaŭnictvu AES i złačynnaj manipulacyi žyćciami i zdaroŭjem ludziej, «nie!» rabavańniu biudžetu. Ułady ihnarujuć našy patrabavańni doŭhija hady, i čas ich vykonvać skončyŭsia! Zaŭtra moža być pozna!» — padkreślivajecca ŭ rezalucyi.
Zbor udzielnikaŭ akcyi, dazvoł na praviadzieńnie jakoj siońnia daŭ Minharvykankam, pavinien prajści z 18.00 da 18.30 kala kinateatra «Kastryčnik», zatym adbudziecca demanstracyja pa vulicach Surhanava i Arłoŭskaj da carkvy ŭ honar ikony Božaj Maci «Spatoleńnie zahinułych», dzie z 20.00 da 21.00 zapłanavany mitynh i cyrymonija ŭskładańnia kvietak.
«Čarnobylski šlach» — vuličnaja akcyja, jakuju biełaruskaja apazicyja pravodzić štohod z 1988 hoda ŭ Minsku ŭ farmacie šeścia, što zaviaršajecca mitynham pradstaŭnikoŭ demsił. Vyklučeńniem byŭ 2011 hod, kali staličnyja ŭłady zabaranili šeście, daŭšy dazvoł tolki na mitynh.
Sioleta hanarovym staršynioj arhkamiteta akcyi «Čarnobylski šlach» stała nobieleŭski łaŭreat Śviatłana Aleksijevič.
