Narešcie śviet daviedaŭsia, kim źjaŭlajecca stvaralnik vielmi zahadkavaj i adnoj z samych papularnych alternatyŭ tradycyjnym valutam — Bitcoin. Jak paviedamlajuć infarmahienctvy, aŭtaram virtualnaj valuty akazaŭsia pradprymalnik z Aŭstralii Krejh Rajt. Svajo pryznańnie jon zrabiŭ u intervju VVS, GQ i Economist.
Krejh Rajt sustreŭsia z pradstaŭnikami ŚMI i prademanstravaŭ techničnyja dokazy svajho Bitcoin-aŭtarstva. Mužčyna pakinuŭ elektronny podpis z vykarystańniem kryptahrafičnych klučoŭ, jakija byli stvoranyja, kali sistema Bitcoin tolki-tolki pačynała raźvivacca.
Doŭhi čas stvaralnikam Bitcoin ličyŭsia niechta Satošy Nakamota. Sprytnyja žurnalisty ŭsimi mahčymymi i niemahčymymi sposabami imknulisia jaho adšukać, adnak usie namahańni byli marnyja. I tolki siońnia śviet daviedaŭsia, što, akazvajecca, hetym čałaviekam-nievidzimkaj byŭ Krejh Rajt. Pa słovach aŭtara, paźniej jon adkryje infarmacyju, dziakujučy jakoj luby achvotny zmoža pierakanacca, što Rajt i jość toj samy Nakamota.
Aŭstralijec pryznaŭsia, što raskryć usie karty jaho vymusili padziei, jakija adbylisia da taho, jak jaho sapraŭdnaje imia stała ŭsio čaściej zhadvacca ŭ śpisach mahčymych stvaralnikaŭ kryptavaluty. Niaŭrymślivyja ŚMI nie davali žyćcia Rajtu, a ŭłady abšukali jahony dom da nitki paśla taho, jak časopisy Wired i Gizmodo apublikavali rasśledavańnie, u jakich Rajta nazyvali aŭtaram Bitcoin.
Kab pakłaści hetamu kaniec, mužčyna vyrašyŭ adkrycca i pakazać siabie ŭsiamu śvietu. Pavodle jaho słoŭ, hrošy i słava jaho nie cikaviać, jon prosta choča spakojna zajmacca svajoj spravaj i dalej. Miž tym lubimaja sprava, pavodle papiarednich padlikaŭ, užo pryniesła Rajtu za 1 młn Bitcoin, a heta prykładna $450 młn.
Bitcoin — heta prahramny kod, jaki nie rehulujecca ni adnoj krainaj abo bankaŭskim nahladnym orhanam u śviecie i nie maje adzinaha emisijnaha centra. Pry hetym emisija Bitcoin abmiežavanaja ałharytmična: tearetyčna kožny ŭładalnik mahutnaha kampjutara moža zarabić Bitcoin šlacham vykarystańnia vyličalnych mahutnaściaŭ, adnak isnuje miaža ahulnaj kolkaści hrošaj u abarocie.
