Prezident Siryi Bašar Asad i hrupoŭka «Isłamskaja dziaržava» znachodzilisia ŭ zmovie. Pra heta havorycca ŭ rasśledavańni telekanała Sky News, pieradaje RBK.
Telekanał spasyłajecca na ŭciečku sakretnych fajłaŭ ID. Razmova ŭ ich, siarod inšaha, idzie pra supracoŭnictva ŭ Palmiry. Pa śćviardžeńni telekanała, niezadoŭha da vyzvaleńnia hetaha staražytnaha horada, jaki niekalki miesiacaŭ byŭ akupavany ID, pradstaŭniki arhanizacyi i siryjskich uładaŭ padrychtavali dakumient. U im havorycca ab advodzie ŭsioj ciažkaj artyleryi i zienitnych kulamiotaŭ ad Palmiry.
Adzin ź pierabiežčykaŭ ź ID paćvierdziŭ telekanału, što hrupoŭka kaardynuje pierasoŭvańnie svaich bajcoŭ, u pryvatnaści, ich sychod z raniej kantralavanych rajonaŭ, ź siryjskimi ŭładami.
Sky News taksama pryvodzić i inšyja dakumienty, jakija nibyta paćviardžajuć supracoŭnictva. Tak, u adnym ź ich havorycca pra kiroŭcu, jaki pavinien byŭ prajechać praz prapusknyja punkty ID i abmianiać naftu na ŭhnajeńni ŭ pradstaŭnikoŭ siryjskich uładaŭ. Pierabiežčyki ź ID zajavili telekanału, što heta handlovaje pahadnieńnie dziejničaje ŭžo niekalki hadoŭ.
U druhim liście havorycca pra padziei listapada 2013 hoda. Z dakumienta vynikaje, što ID atrymali źviestki pra bambavańni rajona Al-Kasr, jakija pavinny prajści ŭ bližejšy čas. U liście raspaviadajecca pra vyvaz usioj zbroi i abstalavańnia z hetaha rajona. Krynicy Sky News śćviardžajuć, što evakuacyja była ŭzhodnienaja ID i siryjskimi ŭładami.
Pravieryć sapraŭdnaść dakumientaŭ niemahčyma, padkreślivaje Sky News. Adnak va ŭsich papiarednich vypadkach infarmacyja, jakaja pastupiła praź ciapierašniuju krynicu, paćviardžałasia, adznačaje telekanał.
