Indeks cen na tavary i pasłuhi ŭ krasaviku 2016 hoda ŭ paraŭnańni z sakavikom vyras na 0,7%, sa śniežniem 2015 hoda — na 6,4%, paviedamiŭ Nacyjanalny statystyčny kamitet.
Bazavy indeks spažyvieckich cen, jaki vyklučaje źmianieńnie cen na asobnyja tavary i pasłuhi, što rehulujucca administracyjna abo majuć siezonnyja vahańni (naprykład aharodnina, sadavina), u krasaviku vyras u paraŭnańni z sakavikom na 0,7%, sa śniežniem 2015 hoda — na 4,8%.
Ceny na charčovyja tavary ŭ krasaviku ŭ paraŭnańni z sakavikom vyraśli ŭ siarednim na 0,8%, niecharčovyja tavary padaraželi taksama na 0,8%, pasłuhi — na 0,5%. U adnosinach da śniežnia 2015 hoda hetyja pakazčyki vyraśli na 5,1, 4,6 i 13% adpaviedna.
Prahnoz inflacyi na 2016 hod składaje nie bolš za 12%. Prezientujučy 5 krasavika ŭ parłamiencie prahramu dziejnaści ŭrada na piać hadoŭ, premjer-ministr Andrej Kabiakoŭ zajaviŭ: isnujuć «mahčymaści dla taho, kab paramietry inflacyi za 2016 hod ŭpisalisia ŭ 12-pracentny rubiež».
«Viadoma, kali nie padniasuć siurpryzy źniešnija faktary — nie budzie kataklizmaŭ z koštam nafty, kursam rasijskaha rubla, z vymušanaj devalvacyjaj biełaruskaha rubla, kab zabiaśpiečyć kankurentazdolnaść našych tavaraŭ, pierš za ŭsio na rasijskim rynku. Heta zapatrabuje karekcyi. Ale ciapier my nie bačym nieabchodnaści štości mianiać u našych płanach pa hetym paramietry», — zajaviŭ premjer.
Kabiakoŭ taksama paviedamiŭ, što ŭrad pavodle daručeńnia prezidenta ŭdakładniaje funkcyi Ministerstva handlu. «Budzie nie prosta Ministerstva handlu, a ministerstva antymanapolnaha rehulavańnia i raźvićcia kankurencyi. Vielmi ŭvažliva buduć prasočvacca hetym viedamstvam pytańni pravilnaści vykanańnia patrabavańniaŭ kankurencyi, kab nie było daminavańnia na tych ci inšych tavarnych rynkach u tych ci inšych rehijonach krainy», — adznačyŭ jon.
Blizu 2020 hoda ŭrad płanuje źnizić inflacyju da 5%.
