Krasavik 2016 hoda akazaŭsia samym haračym za ŭsiu historyju nazirańniaŭ, havorycca ŭ spravazdačy Nacyjanalnaha ŭpraŭleńnia pa pavietrapłavańni i daśledavańni kaśmičnaj prastory (NASA).
Tablica NASA składzienaja na asnovie siarednich značeńniaŭ tempieratury vady i pavietra z 1951 pa 1980 hod — jany ŭziatyja za 100. Ličby bolš za sotniu aznačajuć rost tempieratury.
Adchileńnie bolš za 1% vyšej za siarednija značeńni ad siaredniaha pakazčyka 1951-1980 hadoŭ fiksujecca ŭžo šosty miesiac zapar. Pavodle prahnozaŭ navukoŭcaŭ, tendencyja da padvyšeńnia tempieratury zachavajecca, pieradaje RIAN.
Na nastupnym tydni taksama buduć apublikavanyja dadzienyja Nacyjanalnaha ŭpraŭleńnia akijaničnych i atmaśfiernych daśledavańniaŭ ZŠA, i ekśpierty miarkujuć, što apošnija 12 miesiacaŭ pabjuć ŭsie tempieraturnyja rekordy.
«Heta pałochaje. Ja nie viedaju, što adbudziecca dalej. My razumieli, što El-Nińjo (vahańnie tempieratury paviarchoŭnaha płasta vady ŭ ekvataryjalnaj častcy Cichaha akijana, jakoje ŭździejničaje na klimat) paŭpłyvaje na situacyju, ale naŭrad ci niechta čakaŭ takoha skačka», — raspavioŭ brytanskaj haziecie The Independent mietearołah Eryk Choltchaŭs.
Navukoviec papiaredziŭ, što ŭ apošni čas rost tempieratur adbyvajecca najbolš rezka, i jon pačaŭ aktyŭna ŭpłyvać na padvodnuju fłoru i faunu. Naprykład, za apošnija 18 miesiacaŭ kala čverci najaŭnych u akijanie karałavych kałonij pačali pakutavać na abieskalaroŭvańnie z-za akiśleńnia i pavyšeńnia tempieratury suśvietnaha akijana, a marskija ldy imkliva rastajuć.
Mietearołah prahnazuje, što rekordna vysokaja tempieratura budzie doŭžycca ad čatyroch da šaści miesiacaŭ.
