Pra heta Benita Ferera-Valdner paviedamiła ŭ liście na imia Alaksandra Milinkieviča.
Kamisar Jeŭraźviaza pa źniešnich suviaziach i palitycy dobrasusiedstva Benita Ferera-Valdner zajaviła ab "hłybokaj rasčaravanaści" apošnimi padziejami ŭ Biełarusi.
Pra heta jeŭrakamisar paviedamiła ŭ liście na imia lidera ruchu "Za Svabodu" Alaksandra Milinkieviča.
Jak paviedamiła 7 traŭnia pres-słužba palityka, B.Ferera -Valdner zaniepakojena praciaham palityčna matyvavanych aryštaŭ i pieraśledaŭ pradstaŭnikoŭ hramadzianskaj supolnaści ŭ Biełarusi. Jeŭrakamisar adznačaje, što śviatkavańnie 90-ch uhodak abviaščeńnia BNR supravadžałasia žorstkim pryhniotam mirnych demanstracyj i "aburalnymi sprobami pahromu niezaležnych srodkaŭ masavaj infarmacyi".
"Hetyja padziei mianie hłyboka rasčaravali, bo apošnim časam my bačyli peŭnyja palityčnyja sihnały, źviazanyja z vyjściem na volu piaci z šaści źniavolenych, pryznanych mižnarodnaj supolnaściu palityčnymi; admovaj ad abvinavačańniaŭ u adras Biełaruskaha Chielsinkskaha kamiteta, a taksama ćviordym namieram Biełarusi zaprasić hrupu doŭhaterminovych naziralnikaŭ ad ABSIE/BDIPČ padčas parłamienckich vybaraŭ u vieraśni. Hetyja kroki vyklikali nadzieju, što kiraŭnictva Biełarusi pačało dziejničać u pazityŭnym kirunku", - piša B.Ferera -Valdner.
Kamisar JEZ u svaim pasłańni nahadvaje ab hutarcy z namieśnikam ministra zamiežnych spravaŭ Biełarusi Valeryjem Varanieckim, jakaja adbyłasia 7 sakavika padčas padpisańnia damovy ab stvareńni ŭ Miensku pradstaŭnictva Jeŭrakamisii. Hałoŭnaj temaj hutarki była prablema palitviaźniaŭ, u pryvatnaści Alaksandra Kazulina, jaki pavinien być biezumoŭna vyzvaleny, kali Biełaruś žadaje raźvivać ščylniejšyja adnosiny ź JEZ.
"Vidavočna, što dla pačatku paŭnavartasnaha partniorstva pamiž Biełaruśsiu i JEZ spatrebiacca inšyja kroki ŭ bok demakratyzacyi, zachavańnia pravoŭ čałavieka i pryjarytetu zakona. Z hetaha hledzišča praviadzieńnie parłamienckich vybaraŭ 2008 hoda budzie vyznačalnym. JEZ budzie pilna nazirać za raźvićciom padziej padčas hetych vybaraŭ", - padkreśliła B.Ferera -Valdner.
