U BDU prajšła sustreča kiraŭnika rasijskaha MZS sa studentami. Siarhiej Łaŭroŭ raspavioŭ pra sustreču z Łukašenkam i pra pazicyju Rasii pa prablemnych pytańniach, uklučajučy siryjskaje i ŭkrainskaje.
Fota: pres-słužba BDU
— Siarhiej Łaŭroŭ — heta adzin ź simvałaŭ Rasii, — pradstaviŭ kiraŭnika MZS RF rektar BDU Siarhiej Abłamiejka.
Na mierapryjemstvie taksama prysutničali pasły dźviuch krain Ihar Pietryšenka i Alaksandr Surykaŭ, ale pierad prysutnymi jany nie vystupali.
Kiraŭnik źniešniepalityčnaha viedamstva Rasii prybyŭ u BDU u pierapynku pamiž sustrečami z prezidentam Biełarusi Alaksandram Łukašenkam i dziaržsakratarom ZŠA Džonam Kiery. Mierapryjemstva zaniało prykładna paŭhadziny, paśla čaho jon adpraviŭsia ŭ aeraport — Łaŭroŭ palacieŭ u Vienu, dzie projdzie pasiadžeńnie Mižnarodnaj hrupy padtrymki Siryi.
Svoj vystup Siarhiej Łaŭroŭ pačaŭ sa zhadki pieramohi ŭ Druhoj suśvietnaj vajnie.
— Na siońniašnich pieramovach (u Pałacy Niezaležnaści) my damovilisia nadać asablivuju ŭvahu pracy pa niedapuščeńni skažeńnia historyi, skažeńnia pryčyn i vynikaŭ vajny — hetyja kroki buduć ciesna kaardynavacca. Asabliva nadavać budziem uvahu nieprymalnaj amaralnaj vajnie z pomnikami, jakuju ŭ Polščy sprabavali raźviazać nacyjanalisty, — skazaŭ kiraŭnik MZS RF.
Jašče adno pytańnie, jakoje abmiarkoŭvałasia na sustrečy z Łukašenkam — supracoŭnictva pa realizacyi prahramnych dziejańniaŭ Sajuznaj dziaržavy ŭ halinie źniešniaj palityki. Rasijski dypłamat nahadaŭ, što prahrama była pryniataja ŭ studzieni hetaha hoda i achoplivaje ŭvieś śpiektr mižnarodnaha paradku dnia.
— Idzie praces pieraraźmierkavańnia ekanamičnaj mocy, palityčnaj vahi. Hety praces balučy dla tych, chto pryvyk zajmać daminujučyja pazicyi ŭ śviecie ŭ płyni šmatlikich stahodździaŭ. Ad hetaj zvyčki vielmi ciažka pazbavicca. Ale abjektyŭny praces pieratvareńnia suśvietnaj sistemy ŭ policentryčnuju, bolš zbałansavanuju, bolš demakratyčnuju idzie i jaho nie spynić, — udakładniŭ jon.
Pavodle słoŭ Łaŭrova, sproby čaplacca za adnapalarnuju kancepcyju śvietu «choć i realizavanyja, ale nanosiać škodu stanu mižnarodnych adnosinaŭ» — jany supravadžajucca sprobami źmieny režymaŭ, umiašańniem va ŭnutranyja spravy inšych krain.
— Zachodnija partniory nie zhadžajucca z tym, kab vybudavać ahulnuju sistemu biaśpieki, — dadaŭ palityk. — Jana isnuje jak palityčnaja dekłaracyja, ale pieratvarać jaje ŭ jurydyčna abaviazvajučyja normy jany admaŭlajucca i nie tłumačać uciamna pryčyn.
Paśla hetaha kiraŭnik MZS Rasii raspavioŭ pra svajo bačańnie taho, što adbyłosia va Ukrainie jak prykład takoj palityki Zachadu.
— Praciaham łohiki «svoj-čužy», jakaja pravodzicca ŭ ramkach Uschodniaha partniorstva, stała situacyja va Ukrainie, dzie adbyŭsia dziaržaŭny pieravarot. Novyja ŭłady pryjšli siłavym šlacham, raźviazali bratazabojčuju vajnu, atrymaŭšy indulhiencyju z boku zachodnich partnioraŭ, meta jakich — zrabić słabaj Rasiju, — ličyć Łaŭroŭ.
U kancy svajho vystupu jon adznačyŭ, što na Zachadzie pačynajuć razumieć «dzie sabaka zakapanaja», a heta značyć, što nievyrašalnych prablem niama.
— Kanfrantacyja z Amierykaj i Jeŭropaj — nie naš vybar, — reziumavaŭ kiraŭnik MZS Rasii.
Vystup Łaŭrova zaniaŭ prykładna 15 chvilin, astatni čas jon adkazvaŭ na pytańni z zały.
Vital Arciomčyk (HA «Ruskaje kulturna-aśvietnickaje tavarystva», kłub «Naśledije» pry Biełaruska-rasijskim univiersitecie) spytaŭ pra formy pracy z moładździu i vykazaŭ pažadańnie — adkryć Rasijskija centry navuki i kultury ŭ Mahilovie i ŭsich abłasnych centrach krainy. Na siońniašni dzień u Biełarusi RCNK pracujuć u Minsku i Breście.
Łaŭroŭ pahadziŭsia z takoj patrebaj i skazaŭ, što ŭ chutkim časie taki centr adkryjecca ŭ Homieli. Suviazi pamiž moładździu dźviuch krain dapamoža taksama ŭmacavać forum maładych dypłamataŭ.
— Na siońniašniaj sustrečy prezident Łukašenka vykazaŭ hatoŭnaść zaprasić taki forum u Biełaruś u 2017 hodzie, — udakładniŭ palityk.
Ministru zamiežnych spraŭ Rasii taksama zadali pytańnie pra «Isłamskuju dziaržavu» — u čym siła hetaj hrupoŭki i chto jaje padtrymlivaje.
— Ja nie budu tut kazać pajmienna, ale zvonku padtrymka idzie. I padtrymka idzie, pierš za ŭsio, ad tych, chto susiedničaje ź Irakam i Siryjaj. Jość takija krainy. A siła ID — pieršy raz, kali terarystyčnaja arhanizacyja zajmajecca nie prosta naviadzieńniem strachu pa ŭsim śviecie, a stvareńniem kvazi-dziaržavy. U hetym nie tolki jaje siła, ale i niebiaśpieka. Tamu što meta pastaŭlenaja — stvareńnie chalifata ad Partuhalii da Pakistana. I jak heta ni sumna, atrymlivajecca ŭ ich vierbavać prychilnikaŭ.
Na dumku Łaŭrova, vierbavać prychilnikaŭ pačynajuć ledź nie z kałyski, aktyŭna vykarystoŭvajučy ŭsio niehatyŭnaje, što adbyvajecca na Blizkim Uschodzie, nieŭrehulavanaść kanfliktaŭ, u tym liku paleścina-izrailskaha.
Daniił Kitarenka (Instytut žurnalistyki BDU, «Rassupracoŭnictva») u svaim pytańni, začytanym ź liścika, abvinavaciŭ ŚMI ZŠA i Jeŭrasajuza ŭ chłuśni: «Jany naŭmysna padmianiali fakty, aśviatlajučy rasijskuju apieracyju ŭ Siryi, niahledziačy na abviaržeńni Russia Today, kanała «Źviezda», UDTRK».
— Jakim čynam možna zmahacca z takim ihnaravańniem? — spytaŭ student. — Jany nastrojvajuć svaju aŭdytoryju suprać siabie.
— Zaŭsiody jość spakusa ŭ luboj ułady vykarystoŭvać ŚMI, — adkazaŭ Łaŭroŭ. — Možna heta rabić na asnovie zrazumiełych pravił, a možna śviadoma stvarać dezinfarmacyju. U The Guardian była ŭciečka ab tym, jak rychtujecca antyrasijskaja kampanija z udziełam vyviedsłužbaŭ i brytanskaha ŭrada — akazałasia, što jany pišuć dla žurnalistaŭ i zamiest žurnalistaŭ fejkavyja naviny.
Kiraŭnik MZS RF padkreśliŭ, što žurnalisty pavinny pakazvać praŭdu i pryvioŭ u jakaści prykładu rasijskich žurnalistaŭ, jakija «na pastajannaj asnovie pracujuć va Uschodniaj Ukrainie».
— Zaprašajuć žurnalistaŭ ź inšych krain — adzinki pryjazdžajuć i sapraŭdy pačynajuć mianiać tanalnaść svaich repartažaŭ. U asnoŭnym, repartažy pišucca biez asabistych kantaktaŭ. Toje ž možna skazać i pra Siryju. Adna z samych papularnych krynic — kvatera ŭ Łondanie, dzie žyvie adzin čałaviek, jakaja nazyvajecca «Siryjskaja absiervatoryja pa pravach čałavieka».
Łaŭroŭ taksama raspavioŭ pra toje, što časam na padstavie skažonaj infarmacyi niasłušnyja vysnovy robiać i pradstaŭniki ŭłady zamiežnych krain. U jakaści kankretnaha prykładu jon pryvioŭ zajavy presy ab razbomblenym špitali «Al Kuds» u siryjskim Alepa. Dypłamat rastłumačyŭ, što hetaja infarmacyja nie raz abmiarkoŭvałasia im z kiraŭnikom Dziarždepa ZŠA Džonam Kiery. Pavodle słoŭ Łaŭrova, paśla taho, jak u ZŠA aznajomilisia sa spadarožnikavymi zdymkami, «usie pytańni byli źniatyja».
— Treba być pilnym nie tolki ŭ adnosinach da zamiežnych partnioraŭ, ale i ŭ dačynieńni da svaich ŚMI, — skazaŭ na zakančeńnie Łaŭroŭ.
Paśla sustrečy jon adpraviŭsia ŭ aeraport.
