Ciotka paŭnočnakarejskaha dyktatara Kim Čen Yna, jakaja ŭžo 18 hadoŭ žyvie ŭ ZŠA, upieršyniu sustrełasia z presaj. Intervju ź joj publikuje The Washington Post u piatnicu, 27 maja.
«Maje siabry tut kažuć mnie, što ja vielmi paśpiachovaja, što ja ŭsio maju. Maje dzieci chadzili ŭ najlepšyja škoły, jany šmat čaho damahlisia. A jašče ŭ mianie jość muž, jaki moža spravicca z čym zaŭhodna. Mnie niama čamu zajzdrościć!» — padzialiłasia jana z karespandentami vydańnia.
Ko Jon Suk i Ry Han, jaki pracavaŭ u KNDR dypłamatam, vyrašyli ŭciačy ŭ 1998 hodzie. Rodnaja siastra Ko Jon Suk, Ko Jon Chi, — žonka byłoha pravadyra Kim Čen Ira — była chvoraja na rak, a ich dzieci padrastali. Siamiejnaja para zrazumieła, što kali Ko Jon Chi pamre, jany stanuć nie patrebnyja, i vyrašyli ŭciačy ŭ ZŠA.
Ko Jon Suk žyvie niedaloka ad Ńju-Jorka, maje troch dziaciej, i jany z mužam vałodajuć chimčystkaj. Jana taksama supracoŭničaje z CRU, dapamahajučy jamu apaznać tych ci inšych pradstaŭnikoŭ vyšejšaha kiraŭnictva krainy. «Ja dumaju, my damahlisia amierykanskaj mary», — skazaŭ jaje muž Ry Han.
