16 maja minčanka Łarysa razam ź jašče čatyrma znajomymi viartałasia z Polščy praz punkt propusku «Bierastavica» (Hrodzienskaja vobłaść). Nie paśpieli jany prajechać ad miažy i 40 km, jak ich mikraaŭtobus spynili supracoŭniki DAI.
Pa słovach surazmoŭnicy, inśpiektar adrazu zazirnuŭ u sałon i paprasiŭ pradjavić dakumienty. Taksama jon zapatrabavaŭ dać aŭtamabil dla ahladu, patłumačyŭšy, što ŭpaŭnavažany nadhladać hruzy na najaŭnaść padakcyznych tavaraŭ i praviarać kolkaść pieraviezienaha praź miažu ałkaholu.
Na pytańnie pasažyraŭ ab tym, ci moža supracoŭnik DAI kapacca ŭ ich torbach, toj adkazaŭ, što kali spatrebicca, to moža, ale naohuł hatovy i praz akienca pahladzieć, raspaviała dziaŭčyna.
Pad naporam sustrečnych pytańniaŭ u mikraaŭtobus inśpiektar tak i nie zajšoŭ i rečy nie praviaraŭ, ale na adnu z pasažyrak skłaŭ pratakoł za niepryšpileny remień biaśpieki. Pry hetym nazvacca supracoŭnik DAI taksama admoviŭsia, adkazaŭšy, što svaje dadzienyja pakaža ŭ pratakole (što jon, treba adznačyć, zrabiŭ).
Hety vypadak nie adzinkavy, padobnyja historyi ŭžo abmiarkoŭvalisia ŭ sacsietkach. Kiroŭcy i pasažyry nie razumiejuć, čamu jany pavinny, pa sutnaści, dvojčy prachodzić mytny kantrol, i ci maje prava aŭtamabilnaja inśpiekcyja ŭ pryncypie praviarać rečy na pradmiet zakonnaści ich uvozu ŭ krainu.
DAI — heta taksama milicyja
Va UDAI UUS Hrodzienskaha abłvykankama raspaviali, što śpiecyjalnyja apieracyi pa vyjaŭleńni padakcyznych tavaraŭ, uviezienych z-za miažy, u vobłaści nie pravodziacca, ale hetaja rabota viadziecca «naturalna, pry nahladzie za darožnym rucham», padčas jakoha ŭžo vyjaŭlalisia vypadki pieravozki ałkaholu abo cyharet.
Pa słovach supracoŭnika adździaleńnia ahitacyi i prapahandy UDAI Aleha Duka, hetyja pravierki nie źviazanyja niepasredna z kantrolem za pieramiaščeńniem tavaraŭ z-za miažy.
Metanakiravanyja mierapryjemstvy pravodziacca tolki kali ŭ supracoŭnikaŭ DAI jość infarmacyja ab tym, što čałaviek moža pieravozić niejki vyznačany hruz.
Tym nie mienš, pavodle jaho słoŭ, DAI moža ŭ cełym kantralavać pieramiaščeńnie padakcyznych tavaraŭ pa terytoryi Biełarusi. Adkazvajučy na pytańnie, čamu hetym zajmajecca mienavita aŭtamabilnaja inśpiekcyja, jon padkreśliŭ, što jaje supracoŭniki źjaŭlajucca pradstaŭnikami pravaachoŭnych orhanaŭ.
«A supracoŭniki Dziaržaŭtainśpiekcyi, kali chtości dzieści kahości, prabačcie, abakraŭ, udaryŭ, ździejśniŭ supraćpraŭnyja dziejańni, nie abaviazanyja reahavać? My nosim pahony, u nas u paśviedčańni napisana «milicyja», forma ŭ nas takaja ž, jak u supracoŭnikaŭ milicyi, adzinaje, što pry nahladzie ŭ nas jość śviatłoadbivalnyja elemienty», — skazaŭ Duk.
Mytny kantrol — pa-za kampietencyjaj DAI
Jak patłumačyŭ juryst Dźmitryj Babiej, supracoŭniki DAI sapraŭdy mohuć praviarać rečy, jakija pieravoziacca ŭ aŭtamabili, ale dla hetaha pavinna być važkaja pryčyna, naprykład, padazreńnie ŭ ździajśnieńni pravaparušeńnia abo złačynstva, albo praviadzieńnie śpiecyjalnaj apieracyi.
Pry hetym śpiecapieracyi, pakolki ich ažyćciaŭlaje Dziaržaŭtainśpiekcyja, pavinny mieć niepasrednaje dačynieńnie da transpartu i biaśpieki darožnaha ruchu. Mytny kantrol nie ŭvachodzić u kampietencyju DAI.
Pry praviadzieńni ahladu pavinien składacca pratakoł, i pratakaliravać nieabchodna ŭsio źmieščanyja ŭ mašynie rečy. Kali kiroŭca admaŭlajecca ad udziełu ŭ hetym pracesie, inśpiektary pavinny spynić dvuch paniatych i pravodzić ahlad pry ich.
«Ahledzieć abo dahladzieć bahažnik u metach vyjaŭleńnia parušeńniaŭ ustanoŭlenych praviłaŭ pierasiačeńnia propusku praź dziaržaŭnuju miažu mohuć tolki supracoŭniki pamiežnaj abo mytnaj słužby. I tolki jany mohuć pravodzić hety kantrol u pamiežnaj i prymiežnaj zonie», — adznačyŭ juryst.
Pavodle jaho słoŭ, u MUS jość paŭnamoctvy dla kantrolu za vykanańniem pahraničnaha režymu, uzmacnieńnia achovy pamiežnaj terytoryi i infarmavańnia zacikaŭlenych respublikanskich orhanaŭ ab stanie pravaparadku na pamiežnaj terytoryi, ale ŭ ramkach svajoj kampietencyi.
Kali ŭ supracoŭnikaŭ DAI jość infarmacyja pra toje, što ŭ mašynie pieravoziacca zabaronienyja pradmiety, u pamiežnaj zonie jany pavinny paviedamić pra heta ŭ pamiežnuju słužbu, spynić transpartny srodak, adchilić kiroŭcu ad kiravańnia da prybyćcia pamiežnikaŭ i abaviazkova rastłumačyć jamu padstavy dla takoha abmiežavańnia ŭ pravach i svabodach, a taksama pravy i abaviazki, jakija ŭźnikajuć u suviazi z hetym, patłumačyŭ juryst.
Da taho ž, dadaje Dźmitryj Babiej, u DAI niama instrukcyi, jakija tavary i ŭ jakim abjomie dazvolena pravozić praź miažu.
Kali kiroŭca parušaje praviły znachodžańnia ŭ pamiežnaj zonie i, naprykład, spyniŭsia bolš čym na try hadziny ŭ nasielenym punkcie, raźmieščanym u pamiežnaj zonie, što zabaroniena, to supracoŭniki DAI taksama pavinny paviedamić pra heta ŭ pamiežnuju słužbu, jakaja i budzie prymać rašeńnie ab dalejšych dziejańniach.
«Darečy, admova inśpiektara DAI pradstavicca źjaŭlajecca hrubym parušeńniem nie tolki PDR, ale i słužbovych instrukcyj», — padkreśliŭ juryst.
