Padčas intervju infarmacyjnamu ahienctvu Reuters Alaksandr Łukašenka skazaŭ, što «naša apazicyja zamiest taho, kab pracavać z narodam, jedzie ŭ ZŠA, Vialikabrytaniju i Niamieččynu, i prosić tam hrošaj» tady jak joj «treba pracavać z našymi hramadzianami, prasić u ich padtrymki. Heta karumpavanaja apazicyja», ‑‑ zajaviŭ prezident Biełarusi. Jon paabiacaŭ bałatavacca na čaćvierty termin i paviedamiŭ ab tym, što «niekalki apazicyjanieraŭ» mohuć «patrapić u parłamient». Hetyja vykazvańni Alaksandra Łukašenki kamientujuć lidery biełaruskaj apazicyi.
Stanisłaŭ Šuškievič, staršynia Biełaruskaj sacyjał‑demakratyčnaj Hramady:
‑‑ Pakul Łukašenka budzie siadzieć na rasijskaj hazavaj hlebie i hubić biełaruskuju ekanomiku dy adpaviadać impierskim intaresam Rasii, jon moža zajaŭlać pra svoj čaćvierty termin. Heta paćviaržaje, što rasijskaja palityka nie źmianiajecca, što Łukašenka im padabajecca, što jon samy lepšy dyktatar i pracuje ŭ intaresach Rasii.
Nakont inšych jaho zajaŭ mahu skazać: ja nie viedaju karumpavanych asob u apazicyi. Moža, tam pry im jość niejkija prydvornyja, jakija razyhryvajuć rolu apazicyjanieraŭ, a siarod ADS takich niama.
A što tyčycca pajezdak za miažu, to kali b ja, atrymoŭvajučy piensiju ŭ paŭtara dalary — 3 tysiačy 200 rubleŭ, nie jeździŭ pa zamiežžy i nie pracavaŭ by ŭ Kalifarnijskam univiersitecie, u Harvardzie, to daŭno pamior by z hoładu. Łukašenka štomiesiačna kradzie maju piensiju, jakaja pryznačanaja zakonam i vypłočvaje toje, što śmiechu varta. Uvohule ŭ nas nie dziaržava, a chieŭra, jakaja zachapiła ŭładu i pravić antydemakratyčnym čynam. I tamu ŭsie tyja zajavy ja tak i ŭsprymaju.
Anatol Labiedźka, staršynia Abjadnanaj hramadzianskaj partyi:
‑‑ Vielmi vialikaja dystancyja pamiž tym, što zajaŭlajecca Łukašenkam i tym, što jość u sapraŭdnaści. Kali my vyjšli ŭ centr Minska kab razdać zarehistravanyja haziety i svajo pasłańnie, heta i było toje, pra što havoryć Łukašenka, — my pajšli ŭ narod. U narodzie my byli roŭna dziesiać chvilin. Paśla nas zakalcavali supracoŭniki śpiecsłužbaŭ i AMAPu, advieźli ŭ pastarunak, dzie my znachodzilisia bolš za try hadziny, i ekziemplary «Narodnaj voli» byli kanfiskavanyja. Heta adzin prykład, ale paŭsiadzionnaja praktyka.
Dla nas zakryty mažlivaści kantaktavać z hramadstvam. Navat padčas apošniaj vybarčaj kampanii, u vybarčaj akruzie, ad jakoj ja bałatavaŭsia ŭ Minski haradski saviet, było vydzielena tolki 1 miesca ( a tam pražyvaje 20000 vybarščykaŭ), dzie ja pavinien byŭ sustrakacca z vybarščykami.
Alaksandr Ryhoravič chłusić, havoryć adno, a nasamreč stvaraje maksimum prablem dla našych stasunkaŭ ź ludźmi. My nie možam atrymać pamiaškańniaŭ dla sustreč, za 14 hadoŭ prybyvańnia Łukašenki va ŭładzie my nie majem ni adnoj chviliny na biełaruskaj televizii i dziaržaŭnym radyjo. Voś heta i jość praŭda.
A što datyčyć padtrymki ludziej, znoŭ ža dla taho, kab havaryć padtrymlivaje hramadstva apanientaŭ režymu ci nie, treba sapraŭdy prosta dapuścić našych pradstaŭnikoŭ u vybarčyja kamisii. Kali ŭ kožnaj kamisii buduć chacia b dva‑try pradstaŭniki ADS, tady my zmožam kazać, ci padtrymlivajuć ludzi demakratyčnyja siły ź ich prahramaj, ci nie.
Tezu nakont karupcyi ŭ apazicyi Łukašenka ekspłuatuje ŭžo 14 hadoŭ. Ale davajcie vyjdziem u «Carskaje siało», jakoje mieścicca niedaloka ad rezidencyi prezidenta. I pabačym, što ŭ katedžach, jakija ciahnuć siońnia pa rynkavych koštach na 700 ‑‑ 800 tysiač dalaraŭ, niama pradstaŭnikoŭ ADS. I pabačym, kolki tam čynoŭnikaŭ ź bližejšaha atačeńnia Ajaksandra Łukašenki. Voś i adkaz.
Pavodle śviedčańnia mižnarodnych arhanizacyj, pa ŭzroŭni karupcyi my vychodzim na pieršaje miesca ŭ Jeŭropie. I heta karupcyja fiksujecca ŭ strukturach dziaržaŭnaj ułady, a nie siarod jaje apanientaŭ.
Lavon Barščeŭski, staršynia Partyi BNF:
‑‑ Mahčymaść mieć adnaho‑dvuch čałaviek u parłamiencie nie zadavolić našu partyju. My zmahajemsia za sumlennyja vybary i kali navat pry minimalnym demakratyčnym padliku hałasoŭ Minskaj vobłaści pieramohuć pradstaŭniki ADS, atrymajem pieramohu.
A nakont karumpavanaści apazicyi zaŭvažu, što karupcyja praduhledžvaje atrymańnie vyhody. Hałoŭnaja vyhoda biełaruskich palitykaŭ i apazicyjanieraŭ — siadzieńnie ŭ turmach. Tamu niachaj sapraŭdy lepš Łukašenka pahladzić na svajo atačeńnie, chto ź ich bolš karumpavany.
Anatol Laŭkovič, pieršy namieśnik staršyni Biełaruskaj sacyjał‑demakratyčnaj partyi (Hramada):
‑‑ Łukašenka ničoha novaha nie skazaŭ, jon zaŭsiody tak tradycyjna kaža, što, kaniešnie, nie na karyść kiraŭnika krainy. Kab jon vykazaŭsia, što apazicyja —nieabchodny elemient palityki, što jana nieabchodnaja navat jak instytut u hramadstvie, što apazicyja dapamahaje raźvivacca hramadzianskaj supolnaści, adkryvaje toje, što kiepska robić ułada i što heta na karyść ułady, tady b ja skazaŭ, što Alaksandr Ryhoravič jak palityk vyras. A da hetych jaho zajavaŭ treba stavicca spakojna.
Siarhiej Kalakin, Pieršy sakratar Centralnaha kamiteta Partyi kamunistaŭ Biełarusi:
‑‑ Usio heta ‑‑ zvyčajnaja bałbatnia spadara Łukašenki. U jaho jość dosyć orhanaŭ i arhanizacyj, jakija rehularna sočać za apazicyjaj i jaje liderami. Adnak akramia hałasłoŭnaj bałbatni, jakaja paŭtarajecca z samaha prychodu Łukašenki da ŭłady, nivodnaha fakta my pakul nie bačyli.
Hetyja vykazvańni na sumleńni spadara Łukašenki, ale heta i havoryć ab tym, što jon pabojvajecca apazicyi i imkniecca jaje ačarnić, vykarystoŭvajučy manapolnaje prava na infarmacyjnym poli. Jon to moža skazać, što apazicyja karumpavanaja, ale adkazać my nie možam, tamu što nam nie daduć dla hetaha mahčymaści.
Što datyčyć zajavy prezidenta ab tym, byccam u parłamient mohuć patrapić niekalkich pradstaŭnikoŭ apazicyi, to heta całkam vierahodna. My majem infarmacyju ab tym, što śpiecsłužby na miescach vyvučajuć śpis 110 kandydataŭ ADS. I ja liču, što chtości z hetaha śpisu moža być paklikany ŭładaj stać apazicyjaj u parłamiencie. Naturalna, heta buduć nie samyja mocnyja našy kandydaty, ale za košt hetaha ŭłada pasprabuje lehitymizavać vybary.
