Hałandskija śledčyja znajšli sopła rakiety «Buk» na miescy krušeńnia «Boinha» ŭ Danbasie, paviedamlajecca ŭ pramiežkavaj spravazdačy sumiesnaj śledčaj hrupy pa spravie ab krušeńni samalota. Dakumient apublikavany na sajcie hałandskaj prakuratury.
om.nl
Svajaki zahinułych atrymali spravazdaču niekalki dzion tamu.
Jak adznačajuć hałandskija ŚMI, ab znachodcy takoj bujnoj častki rakiety na miescy krušeńnia rejsa MH17 paviedamlajecca ŭpieršyniu.
Kab vyśvietlić pryčynu katastrofy, ekśpierty na avijabazie Hiłze-Rejen źbirajuć pa častkach korpus samalota. Taksama jany zajmajucca pošukami abłomkaŭ rakiety, jakaja, jak miarkujecca, źbiła avijałajnier.
Da palavych rabot pryciahnutyja supracoŭniki palicyi ź viedańniem ruskaj i ŭkrainskich moŭ. Jany prasłuchoŭvajuć zapisy telefonnych razmoŭ, pierachoplenyja Słužbaj biaśpieki Ukrainy, i sprabujuć vyjavić, ci ujaŭlajuć aŭdyjofajły jakuju-niebudź značnaść dla rasśledavańnia.
Taksama ŭ spravazdačy havorycca, što śledčyja sabrali ŭzory hleby ŭ rajonach, ź jakich, jak miarkujecca, była zapuščanaja rakieta, jakaja źbiła rejs MH17. Uzory buduć adpraŭlenyja na chimičny analiz.
U śledčych taksama jość cełaja rakieta «Buk», jakuju jany raźbirajuć pa častkach i paraŭnoŭvajuć frahmienty z najaŭnymi ŭ ich detalami.
Jak paviedamlałasia raniej, kančatkovyja vyniki rasśledavańnia buduć prezientavanyja hetaj vosieńniu.
Nahadajem, katastrofa samalota Boeing-777 rejsa MH17 zabrała žyćci 283 pasažyraŭ i 15 členaŭ ekipaža, u tym liku 80 dziaciej.
