Jak piša ŭ Facebook pradstaŭnik Śledčaha kamiteta Julija Hančarova, spravu adnavili.
«U suviazi z bolš ciažkimi nastupstvami, jakija nastupili ŭ vyhladzie śmierci paciarpiełaha. Rasśledavańnie pačałosia pa nanova adkrytych akaličnaściach. Śledstva pryznačyła i atrymała vyniki paśmiarotnaj sudova-miedycynskaj ekśpiertyzy, jakaja ŭstanaviła, što śmierć nastupiła ad atrymanych cialesnych paškodžańniaŭ. Takim čynam ustanoŭlena pryčynna-vynikovaja suviaź pamiž dziejańniami abvinavačanaha i śmierciu Piščeŭskaha».
Upraŭleńnie Śledčaha kamiteta Centralnaha rajona Minska raspačało kryminalnuju spravu ŭ adnosinach da Dźmitryja Łukaševiča. Artykuł — «pryčynieńnie śmierci pa nieaściarožnaści» (č. 1 art. 144 i č. 1 art. 339 KK). Spravu pieradali prakuroru. Toj, jak čakajecca, adpravić jaje ŭ sud. Łukaševič ciapier pad padpiskaj pra niavyjezd.
Dźmitryj Łukaševič udaryŭ 31-hadovaha Michaiła Piščeŭskaha padčas sprečki, jakaja zaviazałasia pamiž imi ŭnačy 25 maja 2014 hoda kala kłuba ŭ Minsku. U vyniku Piščeŭski atrymaŭ ciažkuju čerapna-mazhavuju traŭmu, jamu vydalili kala 20% hałaŭnoha mozhu. Ad taho času jon byŭ prykavany da łožka, a ŭ kastryčniku minułaha hodu pamior. Na sudzie było zaśviedčana, što pryčynaj sprečki stała abraza Piščeŭskaha pavodle jahonaj nietradycyjnaj seksualnaj aryjentacyi — jon byŭ hiejem.
Sud pryznaŭ Łukaševiča vinavatym u naniasieńni traŭmy i prysudziŭ jamu 2 hady i 8 miesiacaŭ źniavoleńnia. 20 žniŭnia 2015-ha jon vyjšaŭ z kałonii pa amnistyi. Za kratami adbyŭ 11 miesiacaŭ.
