Adzin z zasnavalnikaŭ Google Łary Pejdž prafinansavaŭ dva prajekty, jakija raspracoŭvajuć piersanalnyja latalnyja aparaty. Pra heta raskazała vydańnie Bloomberg Businessweek sa spasyłkaj na 10 ananimnych krynic, blizka znajomych ź situacyjaj.
Kadr ź filma «Nazad u budučyniu»
Kampanii nazyvajucca Zee.Aero i Kitty Hawk, jany pracujuć całkam niezaležna adna ad adnoj, spaborničajučy ŭ dasiahnieńniach. Viadoma, što Pejdž ukłaŭ u Zee.Aero bolš za 100 miljonaŭ dalaraŭ, pačynajučy z momantu jaje zasnavańnia. Kitty Hawk Pejdž pačaŭ finansavać ŭ 2015 hodzie, suma inviestycyj nie nazyvajecca.
Zee.Aero pracuje nad latalnym aparatam, jaki nahadvaje pamienšany samalot. Kitty Hawk, naadvarot, stvaraje kvadrakoptar, dosyć vialiki, kab vieźci pasažyra. Abodva ofisy znachodziacca ŭ Kramianiovaj dalinie, akružanyja ziamloj, jakaja naležyć Google.
U abodvuch prajektach pracujuć viadomyja śpiecyjalisty pa technałohijach i avijacyi. Kiraŭnik Kitty Hawk — były zasnavalnik łabaratoryi Google X, jaki taksama zajmaŭsia raspracoŭkaj bieśpiłotnaha aŭtamabila. U Zee.Aero pracujuć inžyniery z prajekta AeroVelo, jakija raniej stvaryli viertalot na muskulnaj ciazie.
Pejdž nie choča afišavać svoj udzieł u prajektach latučaj mašyny. Jaho cikavaść u hetaj śfiery — «asabistyja ambicyi» i žadańnie vykanać dziciačuju maru. U adnym ź ich jaho navat pradstavili supracoŭnikam pad psieŭdanimam GUS — the guy upstairs («chłopiec naviersie»).
Miascovyja žychary niekalki razoŭ zaŭvažali niezvyčajnyja latalnyja aparaty. U apošnija miesiacy supracoŭniki aeraporta Cholister bačyli dva pratatypy aŭtamabilaŭ Zee.Aero z vuzkim korpusam, kabinaj dla adnaho čałavieka i prapielerami ŭ zadniaj častcy Rabotniki nie nazyvajuć imia Pejdža ŭ suviazi z vyprabavańniami, adnak čuli, što ŭładalnik prajekta vielmi bahaty.
Niama nijakaj harantyi, što mašyny chacia b adnaho z prajektaŭ kali-niebudź uźlaciać. Pa słovach krynic, jość mnostva prablem pravavoha i technałahičnaha płana. Adnojčy Pejdž zajaviŭ, što kali jaho ŭdzieł u prajektach stanie zdabytkam hramadskaści, jon spynić finansavańnie prajektaŭ.
