Internet-partał World Database of Happiness (Suśvietnaja baza źviestak pra ščaście) vykłaŭ vyniki daśledavańniaŭ, u jakich nazvaŭ samyja ščaślivyja i niaščasnyja krainy śvietu.
Aŭtary pracy razhladali 95 dziaržavaŭ. Siarod samych niaščasnych krainaŭ pieršymi stali Biełaruś i Małdova. Paśla značacca Uźbiekistan, Ruanda i Zimbabve.
Pavodle atrymanych źviestak, pieršyja pazicyi ŭ niezvyčajnym chit-paradzie ščaślivych krainaŭ zajmajuć Šviejcaryja i Danija. Za imi ŭ rejtynhu iduć Aŭstryja, Isłandyja, Finlandyja, Aŭstralija, Šviecyja, Kanada, Hvatemała, Luksiemburh, Irłandyja, Mieksika i Narviehija.
World Database of Happiness - internet-partał, dzie sabrany materyjały, pryśviečanyja navukovamu vyvučeńniu ščaścia. Jaho stvaryli ŭniviersitet Erazma Raterdamskaha ŭ Niderłandach i Rut Venchoven - sacyjołah i psichołah. Venchoven zacikaviŭsia pytańniem, što takoje ščaście i jak jaho dasiahnuć, kali byŭ jašče studentam. U kancy 90-ch hh. jon zasnavaŭ svoj partał u Internecie, kudy rehularna vykładajucca psichałahičnyja i sacyjałahičnyja daśledavańni pa hetym aktualnym pytańni.
Pieramožcy źmianiajucca z hodu ŭ hod, adnak ahulnaja tendencyja zastajecca vidavočnaj: lepš za ŭsio pačuvajucca žychary stabilnych krainaŭ Jeŭropy.
Jašče adna cikavaja tendencyja, jakuju adznačaje World Database of Happiness, datyčyć źmieny samaadčuvańnia jeŭrapiejcaŭ pačynajučy z apošniaj traciny minułaha stahodździa. Tak, na dumku Ruta Venchovena, uzrovień zadavolenaści ludziej padvysiŭsia ad 1975 h. u bolšaści zachodnich krainaŭ.
