Adnavilisia pastaŭki tavaraŭ u kramy sietki ProStore u Minsku, paviedamiŭ namieśnik staršyni Minharvykankama Andrej Damaracki.
«Pastaŭščyki adnaŭlajuć pastaŭki tavaraŭ u kramy sietki ProStore. Ź siońniašniaha dnia ŭsie pastaŭščyki prystupili da pastaŭki tavaraŭ», — skazaŭ jon.
Pavodle jaho słoŭ, situacyja vakoł bujnoj handlovaj sietki vyrašyłasia dziakujučy sumiesnaj pracy Minharvykankama, Ministerstva handlu, Savieta Ministraŭ, ZAT «Prastor-Trejd» pa rašeńni asnoŭnych prablemnych pytańniaŭ.
Adnosna finansavaha boku ŭzajemaadnosin partnioraŭ namieśnik staršyni harvykankama paviedamiŭ, što ZAT «Prastor-Trejd» «zrabiła raźliki z pastaŭščykami za pastaŭlenyja raniej tavary, čym pierakanała partnioraŭ u vykanańni damoŭnych adnosin».
Andrej Damaracki taksama dadaŭ, što Minharvykankam trymaje na pastajannym kantroli pytańni pa nasyčeńni tavarami mahazinaŭ sietki ŭ adpaviednaści z hrafikami pastavak. U bližejšyja dni ŭ sietcy ProStore budzie pradstaŭlena bolš za 50 tysiač najmieńniaŭ tavaraŭ. «Spadziajomsia, što pryniatyja miery dazvolać viarnuć davier spažyŭcoŭ, i jany znoŭ buduć rabić pakupki ŭ kramach ProStore», — padkreśliŭ namieśnik staršyni Minharvykankama.
Jak paviedamlałasia raniej, u Minsku była stvoranaja rabočaja hrupa pa manitorynhu sietki hipiermarkietaŭ ProStore. U jaje skład byli ŭklučanyja pradstaŭniki hałoŭnaha ŭpraŭleńnia spažyvieckaha rynku Minharvykankama, upraŭleńnia ekanomiki, finansaŭ i cen Ministerstva handlu, adździeła spahnańnia płaciažoŭ upraŭleńnia ŭliku padatkaŭ, spravazdačnaści i ekanamičnaha analizu inśpiekcyi MPZ pa Minsku, hałaŭnoha ofisa AAT «ASB Biełarusbank», ZAT «Prastor-Trejd «.
