Kalehija pa kryminalnych spravach Minskaha haradskoha suda, razhledzieŭšy 17 červienia ŭ apielacyjnym paradku spravu bajca Dobraachvotnickaha ŭkrainskaha korpusa «Pravaha siektara» Tarasa Avatarava, pakinuła vyniesieny jamu prysud bieź źmien.
5 maja sud Frunzienskaha rajona Minska pryhavaryŭ 29-hadovaha žychara Navapołacka Tarasa Avatarova da piaci hadoŭ pazbaŭleńnia voli ŭ kałonii ŭzmocnienaha režymu biez kanfiskacyi majomaści. Jon pryznany vinavatym u niezakonnym abarocie vybuchovaha prystasavańnia na asnovie askołačnych hranat dla stankovaha hranatamiota AHS-17 «Połymia» i jaho niezakonnym pieramiaščeńni praz mytnuju miažu Biełarusi (č. 2 art. 295 KK i č. 2 art. 228 KK). Vinu pa pieršym składzie Avataraŭ pryznaŭ, pa druhim — nie.
Kalehija pa kryminalnych spravach Minharsuda admoviła ŭ zadavalnieńni skarhi advakata Avatarava i pratestu prakuratury. Takim čynam, pryhavor suda Frunzienskaha rajona nabyŭ zakonnuju moc, i zaraz abarona moža tolki źviartacca z nahladnymi skarhami na imia staršyni Minharsuda i ŭ vyšejšyja instancyi.
Padčas siońniašniaha razhladu spravy sud taksama admoviŭsia zadavolić chadajnictva i dałučyć da materyjałaŭ spravy pierapisku advakata ź Dziaržkamitetam sudovych ekśpiertyz, jaki admoviŭsia padać abaronie źviestki ab mietodykach, jakija ŭžyvajucca pry praviadzieńni vybuchatechničnych ekśpiertyz, a taksama ab kole asob, jakija ŭdzielničali ŭ takoj ekśpiertyzie pa spravie Avatarava.
Sud taksama admoviŭsia dałučyć da materyjałaŭ spravy infarmacyju abarony pra toje, što vykarystanyja pry praviadzieńni ekśpiertyzy elektronnyja vahi nie byli siertyfikavanyja.
Advakat Kryścina Marčuk ličyć admovu Dziaržkamiteta sudekśpiertyz nieabhruntavanym i miarkuje, što hetamu viedamstvu «jość što chavać».
Dziŭnaj padałasia naziralnikam admova suda zadavolić pratest prakuratury. Prakuratura, u pryvatnaści, prasiła sud unieści čysta techničnyja źmieny ŭ prysud: paznačyć pravilny čas prybyćcia Avatarava na biełaruska-ŭkrainskuju miažu (čas, pakazany ŭ pryhavory, nie supadaŭ z časam, nazvanym u materyjałach kryminalnaj spravy), a taksama vypravić pamyłku ŭ napisańni punkta mytnaha afarmleńnia (u pryhavory zamiest «Novaja Huta» značycca «Novaja Ruta»).
Padčas pasiadžeńnia advakat asabliva źviarnuła ŭvahu suda na toje, što jašče da ŭvachodžańnia pryhavoru ŭ siłu Avatarava adpravili ŭ papraŭčuju kałoniju. «Heta značyć, jon faktyčna ŭžo adbyvaje pakarańnie», — padkreśliła abaronca.
