U Klecku ŭ milicejskuju abłohu ŭziali siadzibu miascovaha aktyvista demakratyčnaha ruchu Siarhieja Panamarova, nad jakoj łunaje bieł-čyrvona-bieły ściah. Haspadar domu ličyć svaju inicyjatyvu zakonnaj; ułady vyrašajuć, što rabić dalej.
Jak paviedamiŭ spadar Panamaroŭ, siońnia ranicaj jon raspaŭsiudžvaŭ u horadzie «Narodnuju Volu» i vydrukavanyja ź Internetu materyjały pra padziei ŭ Klecku. Nieŭzabavie aktyvist adčuŭ, što na jaho źviarnuła ŭvahu milicyja:
(Panamaroŭ:) «Za mnoj uviazalisia spačatku dvoje milicyjantaŭ, potym z druhoha boku majoj siadziby źjaviŭsia treci. Kali ja razdaŭ usiu litaraturu, to pajšoŭ prosta na milicyjantaŭ. Ale pakolki ŭ mianie jość druhaja bramka, ja zaskočyŭ dadomu. Nie AMAP, a prostyja milicyjanty padyšli da płotu, pačali zahladać u ščyliny. Ale tam žyvie moj ratvejler, i tamu jany bajacca zachodzić».
Jak miarkuje Siarhiej Panamaroŭ, kleckija milicyjanty dziejničajuć na ŭkazańnie kiraŭnictva miascovaha rajvykankamu. Čynoŭnikaŭ, vidavočna, razdražniaje apazycyjnaja dziejnaść Panamarova. Staŭleńnie asabliva pahoršała paśla źjaŭleńnia nad siadzibaj Panamarova ściaha:
(Panamaroŭ: ) «Try tydni tamu ja paviesiŭ na svajoj terytoryi, na svaim asabistym učastku ściah – bieł-čyrvona-bieły. Tam łaźnia takaja, ja zrabiŭ admysłovaje hniazdo, na žaleznym stryžni na samym viersie visić ściah. Trapiečacca takoje pałotnišča, jakoha čamuści vielmi baicca dziejnaja ŭłada».
Siarhiej Panamaroŭ žyvie ŭ samym centry Klecku – pa vulicy Savieckaj. Pobač ź jahonaj siadzibaj uvachod u haradzki park, niedaloka klecki rynak, pradprymalnickija kramy. I tamu vyviešany im bieł-čyrvona-bieły ściah štodnia bačać dziasiatki, kali nia sotni miascovych žycharoŭ. Ścieraže ściah ratvejler Roci, valjer jakoha znachodzicca pablizu. Pavodle spadara Panamarova, kali b nia Roci, to milicyjanty b ściah užo źniali.
Miž tym, ułady Klecku vyrašajuć los bieł-čyrvona-biełaha pałotnišča – vyznačajuć pravavy charaktar inicyjatyvy spadara Panamarova. Voś što patłumačyŭ Radyjo Svaboda namieśnik načalnika rajonnaj milicyi Ivan Majsiejčyk:
(Majsiejčyk: ) «Tut prachodziać masavyja mierapryjemstvy, nabližajecca 9 traŭnia. Da nas źviarnulisia veterany, što jany zmahalisia pad inšym ściaham, a pad bieł-čyrvona-biełym palicai rasstrelvali mirnych hramadzianaŭ. Tamu my pravodzim pravierku i budziem davać pravavuju acenku, jość tam niejki skład pravaparušeńnia albo niama».
