Prajekt prahramy sacyjalna-ekanamičnaha raźvićcia Biełarusi na 2016—2020 hady, jaki pavinien być pryniaty na V Usiebiełaruskim narodnym schodzie, źjaŭlajecca realistyčnym, ale «dazvalaje značna dadać» u raźvićci krainy, zajaviŭ Alaksandr Łukašenka.
«Siońniašniaja hłabalizacyja, fundamientalnyja zruchi ŭ suśvietnaj ekanomicy staviać pierad nami, jak i pierad inšymi krainami, novyja zadačy, u vyrašeńni jakich majucca roznyja varyjanty. Ščyra skažu, nam varta vybrać lepšy ź ich, kab enierhična ruchacca napierad da materyjalnaha dastatku, duchoŭnaha bahaćcia, dabrabytu kožnaha hramadzianina, da roskvitu rodnaj Biełarusi. Ale dla hetaha ŭ pieršuju čarhu patrebnyja adzinstva i zhoda ŭ hramadstvie, mir i paradak u krainie», — zajaviŭ Łukašenka.
Na jaho dumku, hałoŭnaje ciapier — vykarystoŭvać luby šaniec i mahčymaść «pieraadoleć usie ciažkaści na šlachu prahresu i stvareńnia, nie paddavacca depresii dy zastoju, zachoŭvajučy ŭsio lepšaje ź minułaha, upeŭniena ruchacca da mety». «Tolki toj, chto idzie, zdužaje darohu. Upeŭnieny, my zmožam paśpiachova stvaryć i raźvivać novyja haliny ekanomiki, dla hetaha jość usie pieradumovy, možam nadać mahutny impuls uzdymu tradycyjnych halin za košt infarmatyzacyi, novych technałohij i aptymalnych mietadaŭ kiravańnia», — ličyć kiraŭnik dziaržavy.
Łukašenka ŭpeŭnieny, što Biełaruś na praciahu piaci hadoŭ moža stać adnym z klučavych centraŭ pryciahnieńnia kapitału i ŭvajści ŭ lik pieradavych krain śvietu.
«Usio zaležyć ad nas, ad našaha vybaru i nastojlivaści ŭ dasiahnieńni pastaŭlenych metaŭ. Žyćcio pakazvaje, što metanakiravanaść naroda zdolnaja tvaryć cudy. Mnie bačycca Biełaruś praź piać hadoŭ pamacnieŭšaj i kvitniejučaj, niezaležnaj i pryjaznaj, pryhožaj i ŭtulnaj dla žyćcia ludziej. Tak i budzie», — zajaviŭ jon.
Łukašenka zaklikaŭ delehataŭ schodu aktyŭna abmierkavać pałažeńni prajekta prahramy sacyjalna-ekanamičnaha raźvićcia: «Analizujcie ich, prapanujcie, jak bolš efiektyŭna razam nam pracavać, kab žyć lepš i lepš».
Zhodna z prajektam prahramy ŭ 2020 hodzie pryrost VUP u paraŭnańni z 2015 hodam pavinien skłaści 12—15%, a realnych hrašovych dachodaŭ hramadzian — 9,5—11,6%. Taksama da kanca piacihodki ŭłady majuć namier skaracić inflacyju da 5%, a staŭki pa kredytach miarkujecca źnizić da 9—11%.
