Kanflikt adbyŭsia 2 krasavika. Na zapisie kamiery videanazirańnia, jakuju mama paciarpiełaha chłopčyka vykłała ŭ internet, vidać, jak tata 7-hadovaha Romy trymaje 9-hadovaha Klima, a Roma bje Klima nahami ŭ žyvot. Historyja vyklikała rezanans u krainie. Jaje abmiarkoŭvali ŭ tok-šou «Forum» na telekanale BT-1.
U mai ŭ dačynieńni da taty Romy raspačali kryminalnuju spravu pa č. 1 art. 339 KK RB ( «Chulihanstva»).
Sudovy praces pačaŭsia 27 červienia. Abvinavačany pryznaŭ, što nie mieŭ racyi ŭ toj situacyi, i vybačyŭsia pierad Irynaj i Klimam. Ale pry hetym mužčyna nie pryznaŭ siabie vinavatym u chulihanskich dziejańniach.
Dziaržabvinavaŭca, pamočnik Baranavickaha mižrajonnaha prakurora Śviatłana Pasiemka prasiła sud pryznačyć abvinavačanamu pakarańnie ŭ vyhladzie dvuch hadoŭ papraŭčych rabot.
Iryna paličyła, što pakarańnie dla taty Romy pavinna być strohim, i paprasiła spahnać 30 młn rubloŭ u jakaści maralnaj škody. Žančyna patłumačyła, što choča na hetyja hrošy zvazić syna na adpačynak u sanatoryj.
Abvinavačany z takoj sumaj nie pahadziŭsia i skazaŭ, što hatovy vypłacić tolki 2 młn.
Sud vynies abvinavačanamu prysud 28 červienia.
Mužčynu pryznali vinavatym u chulihanstvie i pryznačyli dva hady papraŭčych rabot. Taksama sud pastanaviŭ, što baćka Romy pavinien vypłacić siamji Klima 15 młn rubloŭ u jakaści maralnaj škody.
