Ministerstva pracy i sacyjalnaj abarony, hruntujučysia na dadzienych aficyjnaj statystyki, zajaŭlaje ab źnižeńni kaeficyjenta napružanaści na rynku pracy Biełarusi. Niezaležnyja ekanamisty ŭ svaju čarhu adznačajuć, što aficyjnyja pakazčyki nie adlustroŭvajuć realnych maštabaŭ biespracoŭja ŭ krainie.
Pavodle źviestak Minpracy, kaeficyjent napružanaści — adnosiny kolkaści zarehistravanych biespracoŭnych da kolkaści vakansij — źniziŭsia z 1,7 biespracoŭnaha na adnu vakansiju na 1 červienia 2015 hoda da 1,5 — na 1 červienia hetaha.
Pry hetym popyt na pracoŭnuju siłu ŭ studzieni—mai ŭ paraŭnańni z anałahičnym pieryjadam minułaha hoda vyras, adznačajuć u ministerstvie. «Na kaniec maja 2016 hoda ŭ orhany pa pracy, zaniatasci i sacyjalnaj abaronie pastupili źviestki ab najaŭnaści 34,8 tys. vakansij, što skłała 134,5% da ŭzroŭniu 2015 hoda. Patreba u rabotnikach pa rabočych prafiesijach skłała 51,6% ad ahulnaj kolkaści vakansij suprać 58,8% na kaniec maja 2015 hoda», — havorycca ŭ ahladzie situacyi na rynku pracy, jaki padrychtavała Minpracy.
Uzrovień zarehistravanaha biespracoŭja na kaniec maja 2016 hoda skłaŭ 1,1% da kolkaści ekanamična aktyŭnaha nasielnictva. Za maj hety pakazčyk źniziŭsia na 0,1 pracentnaha punkta, adznačajuć u Minpracy.
Pavodle dadzienych ministerstva, kolkaść asob, jakija rehistrujucca ŭ jakaści biespracoŭnych, u paraŭnańni ź minułym hodam źmienšyłasia. Tak, kali ŭ mai 2015 hoda ŭ jakaści biespracoŭnych byli zarehistravany 15 tys. čałaviek, to za anałahičny miesiac biahučaha hoda — 12,7 tys. čałaviek. U krasaviku 2016-ha słužby zaniataści zarehistravali 15,1 tys. rabotnikaŭ suprać 16,6 tys. u krasaviku minułaha hoda.
Miž tym niezaležnyja ekanamisty ličać, što aficyjny pakazčyk biespracoŭja nie adlustroŭvaje realnyja maštaby hetaj źjavy ŭ krainie, bo z-za nizkaha pamieru dapamohi (składaje kala 13 dołaraŭ u miesiac) šmat biespracoŭnych aficyjna nie chočuć rehistravacca.
Na dumku ekśpiertaŭ, ciapierašni pamier dapamohi pa biespracoŭi zanadta mały (u mai siaredni pamier dapamohi pa biespracoŭi składaŭ 15,4% biudžetu pražytačnaha minimumu), choć u mnohich krainach dapamoha źjaŭlajecca adnoj z najvažniejšych mier padtrymki ludziej u vypadku straty pracy.
«Heta toj instytut sacyjalnaj abarony, jaki pavinien dapamahać biespracoŭnym pieražyć składany pieryjad. Pamier ciapierašniaj dapamohi, jakaja składaje kala 260 tys. rubloŭ, — karykatura na toj instytut, jaki pavinien abaraniać ludziej u vypadku straty pracy», — padkreślivaje staršy daśledčyk Centra sacyjalna-ekanamičnych daśledavańniaŭ (CASE Biełaruś) Uładzimir Valetka.
