U noč na 1 lipienia ŭ Biełarusi maje adbycca hałoŭnaja ekanamičnaja padzieja hoda — denaminacyja. Miljony i tysiačy adychodziać u niabyt, zatoje viartajucca kapiejki. Apošni raz biełarusy karystalisia manietami ŭ saviecki čas. Adkidańnie nuloŭ viernie mnohich u toj čas, kali kaŭbasa kaštavała 2 rubli 20 kapiejek.
Davajcie dla paraŭnańnia pieraniasiomsia ŭ 1986 hod — tady jašče savieckaja ekanomika dziejničała ŭ svaim stabilnym režymie.
U 1986 hodzie siaredni zarobak u BSSR składaŭ 180 rubloŭ. Ciapier siaredni zarobak składaje 718 novych rubloŭ. «Roźnica» — 4 razy.
Uzhadajem, jakija ceny byli tady i jakija ciapier.
fota Onliner.by
Zrazumieła, paraŭnovać spažyviecki košyk tych i ciapierašnich časoŭ nie zaŭsiody karektna. U kramach sotni tavaraŭ, jakich savieckija hramadzianie nie bačyli ŭ vočy. Hłabalnaja ekanomika i kankurencyja vytvorcaŭ dazvolili pakaštavać stravy inšych kuchniaŭ dy pałasavacca ekzatyčnymi fruktami.
Ź inšaha boku, kab znajści takuju jałavičynu ci kurycu, jakija byli ŭ SSSR, treba pastaracca. Miasa tady było nibyta tańniejšaje, čym ciapier, ale značna horšaj jakaści — z kostkami, pieramarožanaje.
Jašče adna asablivaść — abjom tavaraŭ. Litrovaje małako ci kiłahramovy pakiet rysu ŭ kramach redka kali ŭbačyš. Tamu ciapierašnija ceny my pieraličyli ŭ raźliku na savieckija narmatyvy.
Siarod bazavych praduktaŭ dla biełarusaŭ daražejšymi stali chleb i hrečka.
Asabliva vidavočnaja roźnica z cenami na chleb. U saviecki čas jon byŭ, ličy, darmavym. Ciapier ža davodzicca płacić realny košt.
A voś što stała ŭdvaja bolš dastupnym, dyk heta harełka.
Raniej na zarobak možna było nabyć 18 butelek, ciapier ža — ažno 120. Voś taki «kłopat» pra zdaroŭje nacyi.
U cełym ža ŭ niezaležnaj Biełarusi ludzi žyvuć našmat bahaciej, čym u SSSR.
